Portada Conceyos Una semeya de l’Asturies del pasáu vien de la Hispanic Society al Muséu d’Avilés

Una semeya de l’Asturies del pasáu vien de la Hispanic Society al Muséu d’Avilés

by redacción asturnews

Una semeya de l’Asturies del pasáu, con fotografíes de Ruth Matilda Anderson, de la Hispanic Society, va poer vese estes navidaes,  dende esti martes 17 d’avientu y hasta’l 16 de febreru, nel Muséu de la Hestoria Urbana d’Avilés.

La esposición amuesa ensin artificios la rexón que la fotógrafa estadounidense Ruth Matilda Anderson atopara nel so percorríu per España en 1925. Podrán vese trés fotografies tomaes n’Avilés: al pie de la vieya rula, nel interior d’un puestu de pan y sobro la vienta ambulante d’alfombres na cai del Muelle.  Inaugúrase esti martes 17 d’avientu, y va permanecer espuesta hasta’l 16 de febreru 2020

Ruth Matilda Anderson dexó unu de los legaos culturales más importantes pa la hestoria d’España, los miles de fotografíes que tomó del país nes sos visites a empiezos del sieglu pasáu, testimoniu imperecedero de persones, costumes y paisaxes que yá nun esisten, nes que retrató tamién Asturies.

Una selección d’eses instantánees podrán vese nel Muséu de la Hestoria Urbana d’Avilés, gracies a la esposición “Afayu de ignorar. Fotografíes de Ruth Matilda Anderson pa la Hispanic Society of America, 1925”, que s’inaugura pasao mañana, martes 17 d’avientu, a les 12.00 hores.

Un compendiu de 88 fotografíes realizaes en 1925 pola entós moza fotógrafa estadounidense (cuntaba con 32 años), que llegó a España por encargu de la Hispanic Society of America con un fin, documentar con imaxes la realidá del país y d’Asturies.

Retrató una rexón tradicional y castiza, con ámbitos de la vida cotidiana que per primer vegada salíen a la lluz, como interiores de viviendes llabradores, pero tamién palacios y tabiernes, actividaes del trabayu nel campu o na pesca. Persones, costumes, llugares, con una calidá escepcional, conformen “l’afayu de ignorar” hasta entós.

Ente les fotografíes, trés son d’Avilés, asitiaes pela redolada de la vieya rula de la ciudá, l’interior d’un puestu de pan y la vienta ambulante d’alfombres na cai del Muelle.

Esta esposición llega a Avilés al traviés de la conceyalía de Cultura y el Muséu de la Hestoria Urbana, y ta entamada por The Hispanic Society of America, el Muséu del Pueblu d’Asturies y el Muséu Casa Natal de Xovellanos de la Fundación Municipal de Cultura, Educación y Universidá Popular de Xixón/Xixón. Con anterioridá espúnxose en Xixón, Uviéu y Llanes.

Podrá esfrutase, con entrada llibre y gratuita, hasta’l 16 de febreru de 2020. L’horariu de visita ye l’habitual del Muséu, de martes a vienres, de 10.30 a 13.30 y de 16.00 a 20.00 hores; los sábados, de 11.00 a 13.30 y de 16.00 a 20.00 hores, y los domingos, de 11.00 a 11.30 hores.

Ruth Matilda Anderson llegó a España como encargu de la Hispanic Society. Fundada en 1904, esta entidá convirtióse llueu nel muséu y biblioteca d’Estaos Xuníos más importante sobro la cultura española ya hispánica. Ente otros galardones, recibió’l Premiu Princesa d’Asturies de Cooperación Internacional 2017.

Tamién te podria gustar