Una obra de Hockney algama’l récord de 90,3 millones en Nueva York

20 09:02 2018 Imprimir

El cuadru del pintor británicu David Hockney ‘Retrato d’un artista (piscina con dos figures)’, de 1972, algamó un aprecio récord d’una obra d’un artista vivu al vendese hai unos díes por más de 90 millones de dólares (80 millones d’euros), con tases ya impuestos incluyíos, n’una puya de Christie’s en Nueva York.

La pieza, qu’en pocu segundos yá algamaba los 60 millones de dólares, superó fácilmente la previa cifra histórica de 58,4 millones que se pagara por unu de los “Balloon Dog” del estadounidense Jeff Koons en 2013.

La obra de Hockney, de grandes dimensiones, ta considerada una de les trés pieces más importantes del artista británicu, de 81 años, y ye la única vegada que combinó dos de les sos temes favorites: una piscina y un doble retrato. Na mesma puya salió a la vienta otra obra de Hockney, “Sprungbrett mit Schatten (Paper Pool 14)”, pintada en 1978, que tenía un valor envaloráu de 6 a 8 millones de dólares, y vendióse por más de 7,2 millones (6,7 millones d’euros).

El pintor británicu, qu’empezó a faese conocíu en Reinu Uníu na década de los 60, convirtióse n’unu de los artistes vivos más populares, anque’l so trabayu primeramente nun yera percibíu con seriedá polos vivos colores qu’utiliza y unes figures demasiáu realistes. Sicasí, na actualidá vive una renacencia comercial y de reputación gracies a trés retrospectives recién, ente elles una nel Muséu Metropolitanu de Nueva York y otra na Tate Britain que rompió récords d’asistencia.

Los espertos apunten que’l récord de Hockney y otres vientes que se fueron viendo esta selmana de puyes, la más importante del añu, apunta a que’l mercáu ta puxando por pieces d’artistes vivos nuna reacción frente a los precios tresmandaos d’obres clásiques.

  Categories: