Una Inmaculada de Murillo acaba “desfigurada” como l’Ecce Homo

Una Inmaculada de Murillo acaba “desfigurada” como l’Ecce Homo
24 xunu 11:28 2020 Imprimir

Los restauradores sollerten de “cambeos irreversibles” nel patrimoniu por “actuaciones desastroses” y non profesionales como la que vieno acabante conocese estos díes, actuaciones como la que cinca a una Inmaculada de Murillo qu’acabara “desfigurada” como l’Ecce Homo mientres una restauración.

La fallida restauración del Ecce Homo de Borja al cargu de Cecilia Giménez dio la vuelta al mundu nel añu 2012. Pero nun se trata d’un casu únicu, una y bones esti tipu d’intervenciones desaparentes sobro’l patrimoniu artísticu son más frecuentes de lo que paez y provoquen “cambeos irreversibles” en delles obres.

Un exemplu acabar d’asoleyalu un coleccionista particular de València, quien encargó por unos 1.200 euros a un restaurador de muebles y otres pieces como espeyos la llimpieza d’una copia d’una de les famoses Inmaculaes de Murillo. La so sorpresa foi mayúscula cuando, al devolve-y la pieza, vio que la cara taba dafechu desfigurado y que, amás, guardaba un esmolecedor paecíu col inclasificable Ecce Homo de Borja.

Al pidi-y esplicaciones al autor de la restauración’, esti intentó ‘solucionar’ el problema, pero la resultancia del trabayu foi una imaxe que nada tien que ver cola orixinal. Agora, el coleccionista púnxose en contactu con otru especialista, esti sí formáu pa esti llabor, que va intentar rehabilitar la obra, rellata’l propietariu.

La vicepresidenta de Relaciones Internes y coordinadora de l’Asociación Profesional de Conservadores Restauradores d’España (ACRE), María Borja, esplica qu’aberraciones como esta son “desgraciadamente muncho más frecuentes de lo que se piensa”. “Solo conocemos los casos que la sociedá denuncia al traviés de prensa o redes sociales, pero hai ensame de situaciones onde les obres son interveníes por persones que nun tienen formación. Les obres sufren esti tipu d’intervenciones non-profesionales, pudiendo, provocar un cambéu irreversible”, asevera.

 

  Categories: