Una güela dibuxante conquista a Disney gracies al so llabor en Instagram

Una güela dibuxante conquista a Disney gracies al so llabor en Instagram
20 avientu 09:55 2018 Imprimir

Con 88 años y más de 157.000 siguidores en Instagram gracies a los sos paisaxes, animales y rincones urbanos dibuxaos con un programa básicu d’ordenador, Concha García Zaera conquistó tamién a Disney, qu’encargó a esta güela qu’espublice en redes sociales la so visión de la nueva Mary Poppins.

Concha, @conchagzaera pa los sos siguidores, nació en Valencia en 1930 y esti domingu xubió la so particular interpretación en Paint del cartelu de la película El regresu de Mary Poppins, “una obra d’arte prácticamente perfecta en too”, según Disney España, y que yá supera los 24.000 ‘gústame’ na cuenta d’esta “instagrammer” octogenaria.

“Ye un personaxe que siempres m’encantó”, asegura esta artista dixital, qu’espera con ganes l’estrenu de la película -al que foi convidada por Disney- y asegura que la propuesta de la compañía supúnxo-y un verdaderu “retu” porque nunca dibuxara cares. Mientres delles selmanes retocó’l dibuxu de la famosa neñera hasta que tuvo “satisfecha”, con especial dificultá nel sombreru y el pelo del personaxe que nesta ocasión encarna Emily Blunt.

“Nun tengo nada d’imaxinación”, confiesa, anque se-y da perbién copiar y l’inspiración vien-y de cualesquier sitiu, la bolsa d’una farmacia o de cualquier tienda, un cuadru nun escaparate, una postal, una caxa d’un xuegu o dibuxos d’una revista. Reconoz que va “cazando” y “robando” imaxes porque cuando ve daqué que-y gusta, fai-y una semeya y depués imprimir, la cuadricula y la copia nel so ordenador.

Esa facilidá pa copiar permitió-y dibuxar páxaros, venaos, peces o gatos, pero tamién faros, la sablera valenciana d’El Saler, la isla griega de Santorini o rincones andaluces, de China o de la so ciudá natal, como la ponte de la Trinidá, el Mercáu Central, la Rula o la Catedral.

La so afición a dibuxar vien de tola vida pero polo xeneral siempres facíalo con llapiceros nun bloc, pero hai más d’una década empezó a dir a la Universidá Popular y aficionóse a pintar al oliu hasta qu’el so home cayó enfermu.

Esplica que s’asustó enforma” cuando la so cuenta empezó a xubir ensin frenu y acaldía llegáben-y miles de mensaxes”, pero agora asegura que conoz a casi tolos sos siguidores pol so nome d’usuariu y que trata de responder a toos.

  Categories: