Una esposición repasa la cartelería de Miguel Solís Santos pa les Xuntes d’Escolines y Escolinos

by redacción asturnews | mayo 6, 2019 8:47 am

Los cartelos de les Xuntes d’Escolines y Escolinos d’Avilés” ye’l títulu d’esta amuesa que xunta 10 obres del ilustrador avilesín. Completen la esposición otros trabayos de Solís pa la Casa la Cultura y el Teatru Palacio Valdés. Hasta’l 8 de mayu a la entrada del auditoriu de la Casa la Cultura.

La entrada del auditoriu de la Casa la Cultura acueye, hasta’l 8 de mayu, la esposición “De les lletres a les imáxenes. Los cartelos de les Xuntes d’Escolines y Escolinos d’Avilés” formada por obres del dibuxante avilesín Miguel Solís Santos. Podrá visitase nos horarios que tien el centru cultural pa les esposiciones: de llunes a sábadu, dende les 11:00 hasta les 13:00 hores y de 18:00 hasta les 21:00 hores, y los domingos, de 11:00 a 13:00 hores.

L’amuesa ta formada polos diez carteleos que sirvieron p’anunciar cada Xunta ente los años 2004 y 2013. Nellos, Miguel Solís asoleya la temática escoyida en caún d’esos años con motivu de la Selmana de les Lletres Asturianes, con presencia de disciplines como la música, el teatru o’l cómic, ensin escaecer los y les escritores de mñas renome na lliteratura en llingua asturiana al lo llargo los sieglos.

Amás, la esposición complétase con otros trabayos que’l dibuxante fizo por encargu del Conceyu d’Avilés rellacionaos cola Casa la Cultura y el Teatru Palacio Valdés, nesti casu con motivu del décimu aniversariu de la reinauguración.

Les Xuntes d’Escolines y Escolinos d’Avilés ye una actividá que fai’l Conceyu d’Avilés per aciu de la Estaya de la Llingua dende hai dieciséis años. Ta pensada como un foru d’alcuentru del alumnáu de dellos niveles de Primaria, Secundaria y Bachilleratu, qu’estudia l’asignatura de llingua asturiana.

Nesti foru intercámbiense esperiencies, trabayos sobre la llingua y la lliteratura asturianes, enséñense proyeutos. Pal alumnáu ye tamién un puntu d’alcuentru onde conocese, rellacionase y pasar un día nun ambiente prestosu, onde pasalo bien, solidariu y amistosu.

Source URL: http://asturnews.com/una-esposicion-repasa-la-carteleria-de-miguel-solis-santos-pa-les-xuntes-descolines-y-escolinos/