Una Comisión va concluyir la tramitación pala Fundación Avilés Enseña

Una Comisión va concluyir la tramitación pala Fundación Avilés Enseña
22 mayu 08:33 2018 Imprimir

Una Comisión va concluyir la tramitación pa constituyir la Fundación Avilés Enseña, el proyectu municipal de turismu idiomáticu avilesín qure cunta yá colos informes favorables (de non duplicidad de competencies y de sostenibilidá financiera) del Gobiernu d’Asturies.

Una Comisión técnica va concluyir la tramitación alministrativa pala constitución y puesta en marcha de la Fundación Avilés Enseña que va llevar a cabu’l proyectu de turismu idiomáticu de la ciudá. La creación d’esta Comisión va ser incluyida nel orde del día del Plenu ordinariu municipal que se va celebrar el próximu xueves, 24 de mayu.

D’esta manera van rematar los trámites alministrativos por que’l Conceyu lleve a cabu’l proyectu d’enseñanza d’español para estranxeros col qu’Avilés va esquizar un nuevu segmentu turísticu qu’ufierta la posibilidá d’aprender español a partir d’un programa educativo y formativo basáu nel aprendizaxe formal y multidisciplinar, según na inmersión llingüística na ciudá y nes actividaes culturales, deportives y d’ociu que nella se desenvuelven de manera que se complemente la enseñanza académica.

L’alumnáu va vese somorguiáu en situaciones nes que van poder faer un usu real de la llingua española, trabayar les mañes y singularidaes del idioma en distintes redolaes, emprestar especial atención al léxicu específicu y crear espacios d’aprendizaxe fuera de l’aula y más allá de les hores presenciales de formación. La previsión ye qu’esta Comisión remate los sos trabayos en xunu coles mires de constituyir la Fundación Avilés Enseña antes de final d’añu.

La creación d’esta Fundación cunta yá colos informes previos favorables del Gobiernu d’Asturies -en cumplimientu de la Llei 27/2013, de 27 d’avientu, de racionalización y sostenibilidá de l’Alministración Local (LERSAL)- que confirmen que nun esiste duplicidad na prestación d’esti serviciu d’enseñanza d’español y que ta garantizada la sostenibilidá financiera del proyectu.

Asina, una vegada atribuyida al Conceyu la competencia pa emprestar el serviciu d’enseñanza de la llingua española y teniendo en cuenta l’interés y beneficiu d’esti proyectu p’Avilés, la Comisión técnica -que va ser sometida a votación nel Plenu municipal- va presentar la Memoria relativa a los aspeutos xurídicos, técnicos, financieros  y de forma de xestión de la Fundación.

La Comisión va tar formada por:

Conceyal de Promoción Económica y de Ciudá, Manuel Riola Menéndez.
Director de la Área Económicu-Financiera y d’Empreses Participaes, Francisco Fernández Viesca.
Xefe de Sección de Promoción Empresarial, José Luis Vega Álvarez.
Xefe de Sección de Comerciu y Turismu, Javier Apuertes Ramírez.
Directora de los Servicios Xurídicos, Reyes Suárez Martínez
Interventora, Pilar González Bueres.

  Categories: