Una cesión de Cástor Ovies amonta la colección del Muséu la Hestoria Urbana d’Avilés

El Muséu de la Hestoria Urbana d’Avilés (MHUA) sigui amontando la so colección. Cástor González Ovies realizó esti selmana pasada una importante cesión de documentos y pieces venceyaos a la hestoria d’Avilés, nun actu que tuvo llugar nel muséu y que cuntó cola presencia de la concejala de Cultura, Yolanda Alonso, y del propiu cedente.

Ente los documentos destaca un exemplar del diariu “Boletín d’Avilés” del 24 de febreru de 1938, nel qu’a toa portada amuésase la esquela que’l Conceyu de la villa dedicó a la figura d’Armando Palacio Valdés  por cuenta del so fallecimientu. Esti Boletín d’Avilés” foi’l nome que llevó’l diariu local “La Voz d’Avilés” tres la Guerra Civil, al tar prindáu por Falanxe Española.

Tamién se venció un cartelu d’una representación nel Teatru Avilés -el primer teatru de la villa, allugáu na cai La Cámara- del 26 d’agostu de 1865; un bocetu del dibuxu del suelu del claustru de San Marcos (Llión), un acta d’allistamientu pa la guerra de Cuba y un magníficu catálogu de la firma británica Pile&co, editáu en 1883, sobremanera tipu d’embarcaciones de pequeñu y gran tonelaxe. Toos estos documentos van formar parte de la colección permanente del muséu, na so sala dedicada a la Villa burguesa”.

Cástor González Ovies apurre amás un destacable fondu del so padre, l’artista Cástor González Álvarez, venceyáu a la Guerra Civil como prisioneru nel campu de concentración de San Marcos, formáu por caricatures, bocetos, fotografíes, negativos y tarxetes postales dibuxaes, ente otros. Tamién del so antecesor, Cástor Álvarez Aceval, compuestu por una semeya, documentación personal y apuntes y publicaciones venceyaes al so llabor pedagóxicu na Escuela d’Artes y Oficios y nel Colexu de la Mercé.

De los fondos venceyaos a la Guerra Civil, parte de los cualos yá se puen contemplar na esposición “El Socialismu Asturiano nel esiliu (1937-1975)”, ta previstu’l so treslláu al Muséu de Llión, institución dependiente de la Xunta de Castiella y Llión, por cuenta de la organización d’una amuesa nel añu 2022 dedicada a la figura de Cástor González Álvarez.

Cabo destacar que nos fondos del muséu yá esistía con anterioridá un importante legáu de la familia de Cástor González Álvarez, formáu por llibros de saléu y otros documentos. Amás, otres donaciones d’avilesinos como Bernardino Fernández-Avello o Mara Fernández Cuesta tamién recuerden a la figura del artista, como les plumillas del Teatru Palacio Valdés o del propiu edificiu de les consistoriales.

Dende la so inauguración el 9 de mayu de 2013 el Muséu de la Hestoria Urbana d’Avilés vio amontada la so colección con numberoses pieces y documentos donaos o vencíos por numberosos avilesinos. El so fondu yá s’avera a un total de 700 elementos que bien formen parte de la so esposición permanente o de depósitu pa estudios y esposiciones temporales.