Portada Música Una carpa de 70 metros acoyerá’l Conciertu pola Oficialidá en Xixón

Una carpa de 70 metros acoyerá’l Conciertu pola Oficialidá en Xixón

by asturnet

Contra les inclemencies del tiempu, una carpa de 70 metros de llargor. La Xunta pola Defensa de la Llingua Asturiana cellebra en Xixón los sos venti años de vida cola mesma reclamación cola que naciera: Esixir la oficialidá del idioma asturianu. Dixebra, Skontra, Skanda, La Bandina y Los Ciquitrinos pondrán el soníu nuna folixa regada con sidra de dos llagares premiaos pol so usu y promoción de la llingua asturiana.

Son los fabricantes de Sidra Choro, de Meres, y de Sidra Alonso, llagar allugáu en Nava, que resultaron galardonaos pola propia Xunta col Premiu Andrés Solar na so edición d’esti añu n’atención al so procuru col emplegu l’asturianu nel etiquetáu.

El conciertu, cuyu empiezu ta previstu pa les 19,30 hores de mañana, sábadu 8 de mayu, nel recintu del Muséu Etnográficu del Pueblu d’Asturies, contará amás cola participación de les bandes de gaites Llangréu y Xiranda y desendolcaráse enriba d’un escenariu de más de doce metros equipáu con una potencia de 50.000 vatios de lluz y soníu. El preciu d’entrada en taquilla ye de 3 euros.

La Xunta pola Defensa de la Llingua Asturiana sorraya la singularidá “emocional” del conciertu d’esti añu, tanto pola cellebración del vixésimu aniversariu de la organización como pola dedicatoria de la XXV Selmana de les Lletres Asturianes, que güei termina, al fallecíu escritor xixonés Andrés Solar, pioneru nel movimientu social que desembocó na creación de la Xunta.

Tamién te podria gustar