Una antigua estudiante de Filoloxía d’Uviéu gana un premiu internacional de teatru

Una antigua estudiante de Filoloxía d’Uviéu gana un premiu internacional de teatru
07 16:15 2018 Imprimir

Ruth Gutiérrez (Santander, 1987, qu’estudió Filoloxía n’Uviéu, acaba de proclamase ganadora del Premi Born, un concursu internacional de teatru que, dende Menorca, premia obres teatrales inédites que s’unvien de forma anónima. El premiu consiste en 14.000 euros para l’autora y la publicación de la so obra, ‘Los amantes sobrehumanos’, en vascu, catalán, gallegu y castellán.

Toa una sorpresa, porque nel palmarés suelen apaecer autores consagraos -Juan Mayorga, Antonio Álamu y Josep María Miro son dalgunos d’ellos- y el testu de Ruth Gutiérrez -qu’estudió Filoloxía Española na Universidá d’Uviéu, onde fixo un máster de Xéneru y diversidá y otru d’Enseñanza del español como llingua estranxera- ye la so ópera prima. Agora peracaba la so tesis doctoral sobro teatru contemporaneu n’Uviéu, con Antonio Fernández Insuela, y trabaya como profesora de Gramática Española na Universidá Politécnica de Nantes. «Tuvi unos meses d’espera nel mio procesu de presentar la tesis y animéme a escribir. Yera lo primero que faía, asina que toi encantada», celebraba ayeri l’autora.

La que-y dio la victoria ye una obra que’l xuráu describió como «un ‘Romeo y Julieta’ disfuncional», pos son dos mozos con discapacidá intelectual los que se namoren, y al traviés d’ellos y les sos families analiza Ruth Gutiérrez la naturaleza humana: cómo estos dos amigos tienen que superar prexuicios y construcciones sociales que se dan por sabíes. «Yo conocí esta tema de primera mano, y sé que ye fácil cayer na demagoxa. Asina que quería analizar l’asuntu dende otros puntos de vista distintos a los habituales, ensin despintar nada. Nin la durez nin la violencia que se da tamién nesti tipu de relaciones». Entá nun hai nada zarráu, confía en que pueda estrenar la obra y, si ye posible, dirixila ella mesma.

  Categories: