Un xuez d’EE.XX. da la razón al Thysen sobro la propiedá d’un Pissarro robáu polos nazis

Un xuez d’EE.XX. da la razón al Thysen sobro la propiedá d’un Pissarro robáu polos nazis
03 mayu 10:45 2019 Imprimir

Un xuez federal n’EE.XX. decidió esta selmana que’l muséu español Thyssen-Bornemisza ye’l lexítimu propietariu d’un cuadru del pintor francés Camille Pissarro robáu polos nazis a la familia de los Cassier, que llevó’l casu énte la Xusticia estadounidense.

El cuadru en cuestión, ‘Rue Saint-Honoré pela tarde. Efectu d’agua’, perteneció a la familia xudía Cassier hasta 1939, cuando Lily Cassier tuvo que desfacer d’él pa fuxir de l’Alemaña nazi.

En pasando por diversu manos pasada la Segunda Guerra Mundial, el Pissarro foi adquiríu en 1976 pol barón Hans Heinrich von Thyssen-Bornemisza y en 1993 pol Gobiernu español como parte de la compra de la so colección privada.

Nel so fallu, el maxistráu, John F. Walker, con tribunal en California, consideró que’l barón Thyssen nun actuó “de papu sanu” cuando adquirió’l cuadru en 1976 al nun verificar qué asocedió con él mientres la Segunda Guerra Mundial magar los nicios de que pudo tar en Berlín.

“El tribunal considera que (nel momentu de la compra) había abondes circunstancies sospechoses o ‘señales d’alerta’ que tuvieron d’haber lleváu al barón a realizar consultes adicionales sobro’l títulu del vendedor”, apuntó’l xuez.

Magar esa considerancia inicial, el maxistráu concluyó que’l Gobiernu español y la fundación pública Thyssen-Bornemisza, que xestiona’l muséu, sí actuaron de papu sanu al adquirir la colección del barón en 1993.

El xuez indicó que so la lexislación española, al nun considerar al Thyssen como “encubridor” d’una compra de mala fe, este tien lexítimamente’l cuadru. “Ye indiscutible que los nazis robaron el cuadru”, dixo’l xuez, al indicar que so llei estadounidense “el lladrones nun pueden tresferir títulos de propiedá a naide, incluyíos compradores de papu sanu”.

Eses lleis, añedió, “nun apliquen nesti casu, sicasí’l tribunal tien d’aplicar la lexislación española y, so lexislación española, la Fundación Thyssen-Bornemisza ye la propietaria del cuadru”.

El xuez, sicasí, indicó nel so fallu que so los Principios de Washington sobro arte confiscado suscritos per España en 1988 y la Declaración de Terezín suscrita en 2009, esiste’l deber moral” de devolver el cuadru a los Cassier.

 

  Categories: