Un videoclip viral saca los colores a la America de Trump

14 mayu 08:55 2018 Imprimir

Un videoclip viral Childish Gambino que yá atropa más de 99 millones de reproducciones en Youtube, This is America, vieno acabante de saca-y los colores dafechu a la América de Trump pola so discriminación racial.

Asocede dacuando qu’un productu cultural de mases solmena a tou un país y abre un alderique na sociedá y eso ye lo qu’asocedió esta selmana con This is America, l’atanante videoclip de Childish Gambino que yá atropa más de 99 millones de reproducciones en Youtube y qu’encendió un brengosu alderique sobro unu de los traumas qu’abasna la sociedá estadounidense: la discriminación racial.

Gambino, el alter ego del polifacéticu Donald Glover, nun ye’l primeru que señala la enorme contradicción que supon que la cultura afroamericana acopara bona parte de la industria del espectáculu estadounidense mientres la comunidá negra siguen sufriendo la discriminación nes cais. Ello ye que el videoclip nun dexa de ser herederu d’una llarga tradición de denuncia, per parte de la intelectualidá afroamericana, ser condergaos al papel de meros entertainers del mundu blancu. Nun dexa de ser paradóxicu que sía precisamente unu de los esponentes d’esta industria’l que lo denuncie –daqué que yá foi criticáu, claro–, pero esto tampoco representa nenguna novedá.

Poro, el clip nun naz de la nada. Va años que los críticos yá punxeron etiqueta al cambéu d’enclín na música negra de mases, que pasaría del puru entretenimientu a la crítica política, nun viraxe que se suel comparar colo asocedío ente les décades de los 60 y 70, en plena eclosión del movimientu de los derechos civiles de Luther King y la so deriva agresiva, los Black Panther. Dende Beyoncé a Kendrick Lamar, configuróse, dicen, la banda sonora del Black Live Matter, el movimientu que denuncia la violencia exercida contras los negros per parte de los cuerpos policiales y que’l so nacencia tuvo llugar nel mandatu de Barack Obama.

Sía que non, el videoclip en cuestión tienlo too pa impactar nos actuales tiempos d’aceleración. El violentu arranque, con un Gambino que dancia allegre pero convulsivamente p’acabar pegándo-y un tiru na nuca a un home encapucháu, nun puede dexar indiferente a naide. Y ye que Glover empecipia’l so macabru baille con un visax que recuerda a la cara de Tio Ruckus, el malu del cómic The Boondocks que representa a un negru que se cree blancu y qu’amás ye racista. Tamién adopta les postures de Jim Crow, un personaxe ficticiu bien popular nel sieglu XIX que representaba xuna parodia burlesca dende’l mundu blancu a la cultura popular negra, y qu’amás dio nome al conxuntu de lleis de segregación racial del sur. Nun fai falta dicir que ye una figura especialmente hiriente y humillante pa los afroamericanos. El clip xeneró tanto discutiniu y analises teóricos nos medios qu’el mesmu Glover trata de nun dar importancia al ésitu.

  Categories: