Un terciu los plaxos detectaos pola Universidá respuenden a cites incorrectes

Más d’un terciu (el 36%) de los casos de plaxu que la Universidá d’Uviéu detectó dende mayu de 2017 gracies al programa ‘Urkund’ nun son consideraos como tal porque contienen cites que nun son correctes, nun referencien por erru o utilicen fontes mal referenciaes.

Casi la metá de los detectaos por esta ferramienta, un 48%, referíense a documentos nos que l’alumnáu copia testos ayenos, faciendo delles alteraciones p’azorronar la copia. Ye nestos nos qu’el software de prevención demuestra la so mayor utilidá para’l profesoráu. Ye’l personal docente quien, a lo postrero hai de determinar si’l testu detectáu ye realmente un plaxu.

Quiciabes la tipoloxía de plaxu con menos incidencia ye, sicasí, la más llamativa. Nun 16% de los casos, los estudiantes copien o traducen talo como un trabayu ayenu y presentar como propiu, ensin fadiase siquier en realizar cambéu dalgunu.

En función de la irregularidá cometida, el profesoráu actúa d’una o otra forma. El 48% de les vegaes adopta midíes sancionadores, aplicando’l Reglamentu d’Evaluación y, polo xeneral, suspendiendo al alumnu na asignatura en cuestión. El 25% adóptense midíes correctores, lo que supon -cuando’l porcentaxe de testu plaxáu nun ye bien alto- pidir al estudiante que rehaga el trabayu, informándo-y sobro’l plaxu cometíu y el so algame. El 12,5% plantéguense midíes preventives, que suelen incluyir una baxada na calificación final y el 14,5% combínense dalgunes de les acciones anteriores.