Un seminariu va debatir sobre llingua, clase y sociedá na Universidá d’Uviéu

24 xineru 00:19 2006 Imprimir

Les relaciones ente llingua, clase y sociedá van ser l’asuntu central del seminariu que va celebrase del 27 al 30 de marzu na Facultá de Xeografía y Hestoria de la Universidá d’Uviéu. Especialistes asturianos y de diversos países van xuntase nel Milán nestes xornaes coordinaes por un comité científicu que formen los hestoriadores Rubén Vega y Rafael Valdés, xunta al filólogu Xulio Viejo.

El Seminariu escomienza na tarde del 27 de marzu con entrambes meses redondes, la primera sobre “Izquierda y derechos llingüísticos”, con Etelvino González ya Inaciu Llope y la otra sobre sindicalismu na enseñanza asturiana. La xornada del 28 va acoyer les comunicaciones “El llinguaxe humanu: de la evolución natural al discursu social” del profesor de la Universidá d’Uviéu, Xulio Viejo Fernández; darréu los tamién profesores de la Universidá uvieína van falar de: “Lengua y clase social” de Noemí González García y “Lengua y sociedad en los clásicos marxistas: sus aportaciones a la luz de la sociolingüística actual” Francisco Erice Sebares; l’hestoriador Faustino Zapico pieslla esta xornada cola conferencia: “La concreción n’Asturies del Estáu lliberal español y les sos alternatives (1808-1898)”.

El día 29 les xornaes tienen programaes les intervenciones:“La ideoloxía llingüística del movimientu obreru na Asturies d’entesieglos” de Rafael Rodríguez Valdés; “Modernidá, Llingua y Rexonalismu na Asturies del primer terciu del sieglu XX” de Pablo San Martín (University of Leeds); “El demonio rojo. La representación de los obreros en la literatura burguesa y fascista” de Luis Benito García Álvarez (Universidá d’Uviéu); y “O galego: unha lingua de maiorias reivindicada por minorías” Carme Hermida (Universidade de Santiago). Les xornaes piesllen el día 30 con “Lengua y movimiento obrero en Galicia” de Víctor Manuel Santidrián (Fundación 10 de Marzo) ; “El primer socialismo vasco y las culturas territoriales de su entorno” d’Antonio Rivera Blanco (Universidad del País Vasco); “Cultura democrática, lenguaje político y lengua en Cataluña, ss.XIX-XX” de Pere Gabriel (Universitat Autónoma de Barcelona); y la mesa redonda: “Asturianismu y movimientu obreru”, con Francisco Prado Alberdi (dirixente de CCOO y del PCE na Transición; anguaño presidente de la Fundación Juan Muñiz Zapico) y Lluis Xabel Álvarez (fundador de Conceyu Bable; profesor d’Estética na Universidá d’Uviéu).

Les inscripciones pa les xornaes cuesten 30 euros y pueden facese nel Seminariu d’Historia Contemporánea de la facultá de Xeografía y Hestoria.

  Categories:
Loading Facebook Comments ...