Un Seminariu Internacional analiza en Cerdeña la comunicación nes llingües minoritaries europees

L’Asturianu, el gallegu, el catalan y l’euskera compartieron col sardu, el corsu, l’occitanu ente otres llingües un “Seminàriu Internatzionale” que col nome de “Linguawebinfo” organizó esta fin de selmana cabera de mayu’l “Consòrtziu Universitàriu de Nùgoro” en Cerdeña. La situación de la comunicación dixital nestes llingües foi la tema central de les ponencies.

El Seminàriu Internatzionale Linguawebinfo foi organizáu pel “Consòrtziu Universitàriu de Nùgoro” y la Universitat Autónoma de Barcelona, dientro del Master de Tradutzione e Comunicatzione in Limba Sarda que cumple esti añu la so tercera edición.

Embaxo’l subtítulu “Sas limbas natzionales e s’informatzione in su mundu de Internet”, esti Seminariu Internacional desendolcóse esti sábadu 27 de mayu nel aula Magna de la universidade de Nùgoro dende les nueve de la mañana a les nueve de la nueche.

Na sesión de la mañana participaron como ponentes el profesor de la Universidá Carlos III de Madrid y director d’Asturnews, Próspero Morán, el profesor de la Universidá del País Vascu, Javier Díaz-noci, y la directora de La Malla.net, Silvia Llombart, que desplicaron a los asistentes la situación de los medios dixitales y de les llingües nes que s’escriben n’Asturies, Euzkadi y Catalunya.

Pela tarde, les llingües sarda, occitana, friuliana, corsa y gallega foron les protagonistes de les esposiciones, cola participación del director de Vieiros.com, Lois Rodríguez.