Un recital poéticu pieslla en Grau les Xornaes ‘Asturianu en Branu’

Un recital poéticu pieslla en Grau les Xornaes ‘Asturianu en Branu’
26 setiembre 10:02 2018 Imprimir

El Serviciu de Normalización Llingüística del conceyu de Grau organiza unas xornadas que llevan por nome Asturianu en branu, que tienen como fin crear una rede constante d’actividades culturales n’asturianu a lo
llargo del branu, y que pieslla güei miércoles con un recital poéticu na Casa la Cultura.

Estas xornadas nacen de la petición de las personas qu’asistieron a los cursos d’asturianu que se fixeron nel conceyu nos anteriores meses ya del interés pola cultura asturiana de los moscones qu’asisten de manera regular a los eventos organizaos dende l’área de Cultura de Grau.

Esti miércoles 26 de setiembre a las 19:00 horas na Casa la Cultura de Grau va faese la segunda parte de las xornadas. D’esta vuelta va organizase un recital poéticu ya un alcuentru lliterariu con dellas personas relevantes dientro de la cultura asturiana, ello yá Laura Marcos, Aida Escudero, Pablo X. Suárez y Javier Cayado Valdés. Esti eventu pretende ser un pequeña xuntanza de poetas mozos pa que la xente de la villa moscona entre en contactu cola actualidá lliteraria más moderna d’Asturias.

La primer cita foi’l día 12 de xuliu ya l’encargáu d’abrir el programa foi Xandru González Fernández, cocineiru de la Escuela Pública Bernardo Gurdiel, que falóu de la influyencia del Mercáu de Grau nel queisu d’afuega’l pitu. La outra cita braniega foi a principios de setiembre ya centróuse nuna ruta etnográfica pola zona salcedana del conceyu de Grau.

Estas xornadas son de baldre y tán dirixidas a la población en xeneral, pues tienen carácter divulgativu. El Serviciu de Normalización Llingüística de Grau, con estas actividades de branu, sigue’l camín d’eventos qu’empezóu hai unos meses nel conceyu ya márcase l’oxetivu de siguir funcionando próximamente.

  Categories:
Loading Facebook Comments ...