Un recital lliterariu, “Compañeru dame tira”, remata na Casa los Alberti de Ciañu los Xueves de Castilletes y Carbón

by asturnet | noviembre 27, 2014 5:49 am

[1]

Esti xueves 27, a les 20 hores, el recital lliterariu Compañeru dame tira va rematar los Xueves de Castilletes y Carbón en Ciañu. Esti recital enmárcase dientro de les V Xornaes Culturales De Castilletes y Carbón qu’organicen la Fundación Nuberu y l’Ayuntamientu de Llangréu.

Nesta edición de Castilletes y Carbón que se remata agora, la Casa los Alberti de Ciañu acoyó les charres: Academia de la Llingua Asturiana, 34 años de trabayu que punxo l’Académicu de la Llingua y Presidente de la Fundación Nuberu Pablo Xuan Manzano; El procesu creativu na producción cinematográfica que lleó’l cineasta Pablo Casanueva; y Política cultural n’Asturies que lleó Ana González Rodríguez, Conseyera d’Educación Cultura y Deporte del Principáu d’Asturies.

Compañeru dame tira ye un recital lliterariu nel que, con guión y dirección de Chechu García, van participar los y les escritores Milio Rodríguez Cueto, Miguel Allende y Solinca Turbón.

Va ponese’l ramu a estes xornaes culturales con un conciertu del grupu Nuberu en Sobrescobiu’l 4 d’avientu, día de Santa Bárbara, patrona de la minería.

Endnotes:
  1. [Image]: http://asturnews.com/bancofotos/fotos/2/6064.jpg

Source URL: http://asturnews.com/un-recital-lliterariu-companeru-dame-tira-remata-na-casa-los-alberti-de-cianu-los-xueves-de-castilletes-y-carbon/