Un pregón de Próspero Morán abre la Folixa de la Primavera de Mieres

Próspero Morán, director d’Asturnews, va ser l’encargáu de saludar a los mierenses nel empiezu de la celebración de la Folixa de la Primavera que se celebra’l prósimu fin de selmana. La villa’l Camín convertirase na capital d’Asturies de la cultura y el xolgoriu a lo llargo de tres díes corrompinaos d’actividaes múltiples y empobinaes a la participación de la xente nelles. Espiches de sidra, degustación de gastronomía del país, teatru, música y baile tradicionales, constitúin el programa de la Folixa d’esti añu, que va cuntar tamién coles ya tradicionales nueches de conciertos folk, nesta ocasión cola banda irlandesa Solas como grupu estrella al llau de N’Arba, Skanda y Mugar.

Mieres acueye’l prósimu fin de selmana una de les fiestes más singulares y atractives del calandariu de celebraciones que s’abre n’Asturies cola llegada del tiempu bonu. Costumes tradicionales como la espicha de primavera recobren el so significáu orixinal como manifestaciones de la identidá asturiana nel contestu d’esta celebración na que s’ufierta una bayurosa gama de propuestes lúdiques y culturares empobinaes a la participación nelles de tolos públicos. Esi ye’l distingu singular que fai de la Folixa de Mieres una celebración única n’Asturies y una de les meyor planificaes en cuantes programación d’actividaes.

Nesta edición será Próspero Morán, director d’Asturnews, el que recueya’l testigu de los pregoneros d’años anteriores: el periodista José Luis Argüelles, en 2003 y l’escritor Xuan Bello na edición del añu pasáu. El so pregón animará a los mierenses a cumplir col oxetivu fundamental de la Folixa: la participación activa de la xente nes actividaes propuestes pa convertir a la villa’l camín nel llugar más vivu del país a lo llargo de tres díes.

La música popular y el folklor tienen un papel destacáu na Folixa de la Primavera, asina dende la tarde del prósimu viernes 15 d’abril hasta la madrugada del domingu 17, percorrerán la villa del Caudal, pasucais de gaiteros y de la banda de música del conceyu; celebraráse un festival de tonada de la mina, unos alcuentros de folklor y el Troféu de Gaita Asturiana “Memorial Chema Castañón”. Les nueches del viernes y el sábadu van acoyer los ya célebres conciertos de folk asturianu y internacional, cola actuación el viernes 15 de Skanda y el conxuntu irlandés Solas, y al día siguiente N’Arba y Mugar.

Amueses de baile tradicional enriba un escenariu y na cai, invitando a la participación nellos de la xente; y espectáculos de teatru concebíos pa la so representación n’espacios esteriores públicos, con un amuesa dedicada al teatru costumista asturianu, son otres de les propuestes de la Folixa. Nella resérvase un sitiu cimeru como espresión cultural propia del país a la sidra y a la gastronomía de raigón autóctonu, probablemente tamién pa que naide pueda dicir al final que la Folixa de la Primavera de Mieres-y supo a poco