Un númberu nuevu del ‘Anuariu de la Música Asturiana’ yá ta disponible.

L’Anuariu de la Música Asturiana llega un añu más fiel a la so cita per estes feches y failo con un repasu fondu a lo que dio de sí’l recién pasáu 2020, con secciones qu’inclúin reportaxes, informes, entrevistes, crítiques, opinión, recoyida de material o anuncies.

L’Editorial, nesta ocasión titúlase ‘Autoxestión & Institucionalización’ y nél fálase de la necesidá de combinar esos dos conceptos si queremos que la música d’espresión asturiana tenga futuru. “Pocos sectores culturales involucren a tanta xente y tan variao como’l de la nuestra música, por ello nun s’entiende l’abandonu institucional que caracterizó tou esti tiempu de réxime autonómicu”, indiquen dende la editorial.

En cuantes a los conteníos, destaca’l reportaxe tituláu ‘Crónica d’una pandemia’, onde se fala de les repercusiones qu’ésta tuvo na música asturiana; l’informe ‘Consumu dixital’, sobre cómo la música del país va adaptándose adulces a les plataformes dixitales; dos artículos sobre’l centenariu del Cancionero Musical de la Lírica Popular Asturiana d’Eduardo Martínez Torner, les páxines especiales dedicaes a facer alcordanza de Celestina Ca Sanchu; o entrevistes al deejay xixonés Fruela 757, Muyeres y Lisardo Lombardía.

L’Anuariu zárrase cola sección Collecha, onde aparecen les producciones discográfiques del 2020. El volume compleméntase con un discu onde se recueyen muestres de lo meyor qu’ufiertó l’añu, con diecinueve cortes repartíos n’estilos como’l folk, el rock, el pop o la canción d’autor, con artistes y grupos como José Manuel Tejedor, Felpeyu, Muyeres, L-R, Alicia Álvarez, Toli Morilla, Tania Pereira, Nacho Vegas, La Tarrancha, Desakato, Misiva o K-Nalón.