Portada Sociedá Un grupu de profesores ya investigadores reclamen un espaciu pa la Filoloxía Asturiana

Un grupu de profesores ya investigadores reclamen un espaciu pa la Filoloxía Asturiana

by asturnet

Un grupu de profesores ya investigadores integraos nel Seminariu de Filoloxía Asturiana firmen un escritu nel que se reflexona sobre l’espaciu de l’idioma asturianu na instrucción académica y nel que se propón un papel activu del “asturianismu universitariu” pa “conocer y orientar” el procesu intelectual y cultural de la recuperación llingüística. L’escritu vien a ser un retruque al qu’otros filólogos pertenecientes a los Amigos de los Bables publicaron en diversos medios.

Nel escritu de Amigos de los Bables refugábase la creación de la especialidá de Filoloxía Asturiana y sofitábase la negativa a entamalu de les instancies universitaries estatales. Esti documentu qu’agora firmen profesores ya investigadores de la Facultá de Filoloxía, ensin aludir directamente a los que s’oponen a la integración nos estudios académicos de la Universidá de la nuestra llingua,afirma qu’énte la reforma de les carreres universitaries y especialmente de les humanidaes entamada a nivel estatal: “la Filoloxía Asturiana debe tener tamién el so espaciu, polo demás reconocíu por toles instancies académiques y polítiques asturianes, y en consonancia cola propia tradición de la Universidá d’Uviéu y con una demanda social real”.

Énte la reforma de les carreres los miembros del Seminariu critiquen “la prevalencia d’una visión eminentemente utilitarista de les sos tradicionales funciones” que “vuelve a cuestionar l’estatus que los saberes humanísticos han tener nella y nel conxuntu de la sociedá”. Sicasí, consideren que’l debate abiertu puede ser tamién positivu pa entamar una reflexón fonda sobre la función de los saberes humanísticos. Nesti alderique ye onde los filólogos del Seminariu ven afayadizo asitiar l’espaciu qu’han tener les llingües y especialmente l’asturiana.

Los firmantes escomiencen el so escritu invocando a la hestórica vinculación de la Universidá d’Uviéu cola realidá llingüística asturiana dende los sos primeros tiempos con figures como’l Padre Carballo, Antón de Marirreguera, los ilustraos, Caveda, Canella, etc. Tamién remembren a filólogos asturianos como Menéndez Pidal, que col so estudiu “El dialecto leonés” inauguró una serie d’investigaciones non interrumpida hasta anguañu. A propósitu de la figura del llingüista l.lenense, nel escritu adelántrase la intención del Seminariu de Filoloxía Asturiana de celebrar un congresu y editar diverses publicaciones l’añu que vien con motivu del centenariu de la imprentación de “El dialecto leonés”.

Respective a que la Universidá d’Uviéu ufierte l’espaciu que la comunidá universitaria y la sociedá piden pa la filoloxía asturiana, l’escritu del Seminariu caltién que “tamién ha saber merecelo, atendiendo de manera práctica a eses demandes que la sociedá vieno xenerando a lo llargo d’estos años (nel terrén de la educación, la comunicación, el mundu editorial, etcétera) y con programes d’ investigación concebíos a más llargu plazu, nun marco siempre abiertu y camudante. Y, naturalmente, sabiendo rendir cuentes d’ello énte la sociedá y la mesma comunidá universitaria”.

Firmen esti escritu Xulio Viejo Fernández, Juan Carlos Villaverde Amieva, Juan Carlos Busto Cortina, Ramón d’Andrés, Taresa Fernández Lorences, Fernando Álvarez Balbuena, Raquel Suárez García, Xosé Nel Comba y Héctor García Gil.

Tamién te podria gustar