Un espertu cree que la famosa cama de Van Gogh entá esiste y ta n’Holanda

La célebre cama que Vincent Van Gogh popularizó col so cuadru El cuartu de Arles, pintáu en 1888 en Francia pol maestru impresionista y que se creía perdida podría atopase na localidá holandesa de Booxmer, al pie de la frontera alemana.

Siquier ye lo que cree l’espertu nel pintor Martin Bailey, quien esplicó a los medios holandeses que sofita la so teoría nuna carta redactada en 1937 pol primu del artista, Vincent Willem, na qu’esti esplicaba qu’entá tenía la cama na que morrió Van Gogh. L’espertu comentó a la televisión holandesa NOS que n’afayando la misiva contactó con Johan van Gogh, un descendiente del pintor, de 94 años d’edá na actualidá.

Hasta 1945 la cama tuvo, según el vieyu, nuna casa de la familia na tamién holandesa Laren, y dempués foi treslladada a Booxmer, cuando la familia donó muebles pa les víctimes de la Segunda Guerra Mundial na rexón.Bailey llogró atopar una fotografía del camión que treslladó los muebles de Laren a Booxmer, pero ende perdió-y la pista a un pictóricu mueble que, hasta agora, pensábase que terminara na basura tres la muerte del pintor en 1890.