Portada Conceyos Un esllumante viaxe pola mitoloxía griega empecipia n’Avilés la programación del Teatru Familiar

Un esllumante viaxe pola mitoloxía griega empecipia n’Avilés la programación del Teatru Familiar

by asturnet

Un cursu más, la conceyalía de Cultura d’Avilés retoma la programación del Teatru Familiar. Vuelve con un esllumante viaxe pola mitoloxía griega de la mano de “Celeste”, teatru de solombres creáu pola compañía asturiana “Lluz, micro y puntu”, que podrá vese esti vienres, 30 d’ochobre, a les 18.00 hores nel Centru Sociocultural de Los Canapés.

Va ser la primera de los seis propuestes escéniques que va poder esfrutar tola familia hasta avientu, toes en Los Canapés. Les entraes pa esta primer función, gratuites, teníen de recoyese na taquilla del propiu Centru Cultural, facilitando los datos personales de los y les asistentes.

Lapicera y Tijereta fabriquen marionetes de solombres nel so taller, onde hai un teatrillo de madera pol qu’entren y salen para dar vida a la lluz. Un día son sosprendíes pola llamada de la diosa griega Eurínome, que los va conducir a un serie d’hestories de fantasía, aventura y amor. Énte los sos güeyos van pasar la creación del Universu, Penélope texendo día y nueche a la espera del so amáu, Pegasu acaballando los cielos en busca de llibertá, la soledá del Minotauru zarráu nel so llaberintu, o les fleches travieses del dios Eros. Una propuesta pa tolos públicos, preferentemente a partir de 5 años, galardonada nesti 2020 colos premios Oh! al Meyor espectáculu pa la Infancia y a la Meyor composición orixinal / espaciu sonoru.

La programación del Teatru Familiar d’Avilés adscribese al Circuitu de l’Artes Escéniques del Principáu d’Asturies y cunta cola cofinanciación de la conceyalía de Cultura d’Avilés, al traviés de la Fundación Municipal de Cultura, y la Sociedá Pública de Xestión y Promoción Turística y Cultural del Principáu d’Asturies.

“Lluz, Micro y Puntu” ye una compañía asturiana formada en 2013 por trés creadores ya intérpretes, Patricia Toral, Chantal Franco y Verónica Galán, qu’esperimenten y ellaboren hestories visuales enmarcaes nel teatru de solombres. Utilicen tecnoloxía analóxica y distintos formatos pa la puesta n’escena, creando imaxes en directu d’una manera poética y artesana. L’alma vertebral ye la música compuesta por Verónica pa cada pieza.

Ver tola programación

Tamién te podria gustar