Portada Cine Un curtiumetraxe en gallego-asturiano ye premiáu en Saldaña

Un curtiumetraxe en gallego-asturiano ye premiáu en Saldaña

by asturnet

El curtiumetraxe “A fiya del sastre” de Marisa López Diz vieno acabante recibir el Premiu Especial del Públicu “Fernando Urgellés” nel I CERTAME DE CURTIUMETRAXES “CINE RURAL” de Saldaña (Palencia).

“A fiya del sastre” ye’l primer curtiumetraxe de Marisa López Diz, rodáu en llingua eo-naviega o gallego-asturiano, y recibió el vienres 17 d’abril el premiu del públicu nel I Certamen de curtiumetraxes sobre cine rural en Saldaña (Palencia).

L’actu contó cola presencia de representantes del gobiernu llocal, del ámbitu cultural y turísticu. Tuvo amenizáu pola música en direuto de la banda de l’Asociación Musical Saldañesa, qu’interpretó dellos temes cimeros de les bandes sonocres de películes famoses de tolos tiempos.

“A fiya del xastre”, foi’l primer curtiumetraxe de Marisa López Diz rodáu íntegramente en Grandas de Salime -sobre too nes instalaciones del Muséu Etnográficu- pero tamién n’otros llugares del conceyu. Basáu nun rellatu de Marisa col que ganó’l premiu Xeira de Narraciones Curties en 2007, esti curtiu de cuasi 19 minutos cuenta la historia que se desendolca nun pueblu del occidente asturianu nos años de posguerra, onde un fechu inesperáu y comprometedor camuda la vida d’unos personaxes que viven nun entornu rural y pacetible.

A fiya del xastre ye una historia cargada de lliteratura, maxa y poesía, con mieos y sentimientos afogaos, con silencios elocuentes que l’espectador interpreta a cada momentu. Una historia qu’a toos resulta familiar.

Esti curtiumetraxe algamó tamién el premiu al meyor curtiu rodáu n’Asturies “Ribadedeva en Corto” 2014 y foi galardonáu col Urogallu de Bronce otorgáu pol Centru Asturianu de Madrid. Marisa fizo y sigue faciendo otros curtiometraxes, tanto dende la so vertiente creadora personal como nel marcu de les sos actividaes como profesora, utilizando esti recursu artísticu como soporte pedagóxicu nes sos clases.

Tamién te podria gustar