Un Conseyeru de Cultura pal Principáu inesperáu, con un currículum impecable: Genaro Alonso

L’inesperáu nomamientu como Conseyeru de Cultura del Principáu del caderalgu d’institutu ya Académicu de la Llingua Genaro Alonso, fondu conocedor como inspector d’educación que ye de l’Alministración educativa asturiana y asturianista ensin tacha dexó ablucada a la sociedá civil asturiana qu’apostaba como sucediera nel restu del Conseyu de Gobiernu con una política continuista del aparatu de la FSA. Lo que vien albidrase como un mensaxe pa Izquierda Xunida tendrá qu’afitase en llibertá d’actuación pa una Conseyería qu’acumula recortes.

Ñacíu en Felechosa, en Conceyu Ayer, hai 59 años, Genaro ALonso ye Llicenciáu en Filoloxía Hispánica pola Universidá d’Uviéu, premiu Estraordinariu de Llicenciatura, doctor en Filoloxía Hispánica (Llingua Española) pola Universidá de Llión y Caderalgu d’Institutu dende 1984 a 1994 cuando s’incorporara al al serviciu d’inspección educativa de la Conseyería, nel que lleva dende entós trabayando.

Ye miembru de númberu de l’Academia de la Llingua Asturiana dende 1990 y foi presidente de l’Asociación d’Inspectores d’Educación d’Asturies (ADIDE) ente 2001 y 2007. Na so étapa como Caderalgu d’institutu foi autor de dellos trabayos rellacionaos cola llingua, dende una perspeutiva pedagóxica.

Alonso sustitúi nel cargu a la uvieina Ana González tres una llexislatura na que la so xestión reoyó bona parte de les crítiques de la oposición y de los sindicatos, que denunciaron retayos nel ámbitu educativu, y que tuvo marcada na so última etapa pol so refugu a l’aplicación n’Asturies de la nueva LOMCE.

Genaro Alonso va tener que pelear, en cuantes aporte al cargu colos recortes recién nes subvenciones a la difusión de la llingua asturiana nos medios de comunicación, el mentáu refugu a la LOMCE, la problemática de los interinos nel entamu del cursu escolar y delles otres cuestiones pa les que de xuru fain falta el rigor y la seriedá que tolos que lu conocen camienten que son característiques propies d’un perfil mui técnicu y mui bien aposentáu.