Portada Música Un conciertu d’opera n’asturianu pieslla la Selmana de les Lletres

Un conciertu d’opera n’asturianu pieslla la Selmana de les Lletres

by redacción asturnews

Un conciertu d’ópera n’asturianu, enmarcáu na 40 Selmana de les Lletres Asturianes, va pesllar les actividaes del programa esti domingu 5 de mayu, a les 12:30 hores, nel Claustru del Muséu Arqueolóxicu d’Asturies.

Los encargaos d’esti estrenu van ser Mario Bernardo Fernández (pianista), Pedro José González (tenor), Juan Salvador Trupia (barítonu) y el Coru de la Universidá d’Uviéu, que van interpretar les pieces que vienen darréu:

  • “Canción del adiós”, lied pa pianu y voz de Tosti.
  • “El secretu”, lied pa pianu y voz de Tosti. “Tristura”, lied pa pianu y voz de Faurè.
  • “Esos güeyos azules”, lied pa pianu y voz de Brahms. “La Tilar”, lied pa pianu y voz de Schubert.
  • “El xanu”, lied pa pianu y voz de Schubert, sobre poema de Goethe. “Nengún duerma”, aria de Turandot, de Puccini.
  • “Los pescadores de perles”, dúu pa tenor y barítonu de Bizet.
  • “La Boheme”, dúu pa tenor y barítonu de Puccini.
  • “Llucíen les estrelles”, de Puccini. “Coru de los esclavos”, de Verdi.

La traducción de les lletres al asturianu ye obra del escritor y músicu Carlos Rubiera Tuya.

Mario Bernardo Fernández (pianista)

Nacíu en Xixón, ye tituláu superior en Música de Cámara y Pianu con Matrícula d’Honor y Premiu Fin de Carrera pol Conservatoriu Superior de Música d’Uviéu, dirixíu por T. Kvernadze y F. J. Pantín. Siguió los estudios cola profesora de la Escuela Reina Sofía de Madrid G. Egiazaro- va. Recibe amás el conseyu de pianistes como J. Colom, G. González, I. Zaritskaya y J. Achúcarro.

Obtuvo munchos premios en convocatories d’ámbitu nacional y internacional, ente los que destaquen los segundos premios de los concursos Ciudad de Ferrol, Citat de Carlet, o los primeros de Casa Viena, Ángel Muñiz Toca, Juventudes Musicales de Gernika, Ciudad de San Sebastián, Concurso Internacional de Ibiza y Rotary Club.

Tien actuao en tola xeografía española, tanto en calidá de solista como integrante de grupos camerísticos. Compaxina la so actividá concer- tística cola docencia nel Conservatoriu Superior de Música d’Uviéu.

Pedro José González (tenor)

Empieza los estudios de cantu n’Uviéu nel Con- servatoriu Superior de Música Eduardo Martínez Torner, onde obtién el títulu de Profesor de Cantu con Premiu Fin de Grau Mediu. Depués acaba los estudios superiores nel Real Conservatoriu Superior de Música de Madrid.

Na Temporada d’Ópera d’Uviéu intervieno en delles producciones como La Bohème, Salomé, Ernani o Romeo y Xulieta, quedando esta ultima ópera rexistrada pal sellu RTV-Música.

Tamién participó nel Festival de Zarzuela d’Uviéu y cantó’l Réquiem de Mozart n’Avilés.

Na actualidá ye componente del Coru de la Ópera d’Uviéu.

Juan Salvador Trupia (barítonu)

Nació n’Uviéu. Formóse n’Arxentina nel Conser- vatoriu Nacional de Música, na carrera de Violín, colos maestros Abraham Bucchalter y Cristina Monasterolo; y na d’Harmonía, Contrapuntu y Composición, con Evaristo Lopez Moure. La so formación vocal débela a Horacio Amauri en Bue- nos Aires y Arthur Levy en Nueva York.

El so repertoriu incluye la canción de cámara, Beethoven, Schubert, Schumann, Brahms, Fauré, Gounod, música eslava, rusa y española y arxen- tina. Les sos grabaciones incluyen La Samaritana de Refice y Misa Splendoris de Panella. Tien cantao más de 40 roles protagónicos en teatros d’Arxen- tina, Uruguái, Paraguái, Perú, Estaos Uníos, Suíza y España (Rigoletto, Don Giovanni, Leporello, Figaro, don Alfonso, Papageno, Eneas, Michele n’Il Tabarro, Marcello en La Bohème…).

Coru de la Universidá d’Uviéu

Con oríxenes a primeros del sieglu XX, en 1963 estabilízase como grupu vocal dientro de la Uni- versidá d’Uviéu. Tien fecho xires per tol territoriu español, amás de per Francia, Portugal, Italia, EE. UU., México, Alemaña, Dinamarca o Polonia. El coru tien un repertoriu amplísimu a capella y un sinfónicu coral estensu.

A lo llargo de la so trayectoria tien collaborao con cuasi toles formaciones orquestales asturia- nes amás d’otres como The Cleveland Institute of Music, The Classic Chamber Orchestra, Orquesta de la Radio de Transilvania o Bournemouth Sym- phony Orchestra.

Dende 1997 el so director titular ye Joaquín Valdeón.

 

Tamién te podria gustar