Un coleutivu asturianista de Podemos IX y Equo quier “Ganar Asturies”

Un coleutivu asturianista de Podemos IX y Equo quier “Ganar Asturies”
18 avientu 12:28 2015 Imprimir

Persones con distintos perfiles que participen en Podemos, Izquierda Xunida y Equo suscriben una carta abierta, a manera de reflexón coleutiva que contribuya a abrir un procesu pa “ganar Asturies”.

Abulta-yos que ye necesario qu´Asturies asuma la so condición de suxetu políticu capaz de desenvolver la so propia estratexa, pa llograr una “marea asturiana” qu’axunte a les fuerces polítiques del cambéu y a los movimientos ciudadanos coles mires de crear un espaciu ganador que supere’l bipartidismu xenerador de los retayos y la corrupción.

Ente los sos enfotos alcuéntrase “osixenar la politica asturiana obliga a frayar el candáu impuestu pola FSA-PSOE tres 32 años de monopoliu del poder en Asturies, evitando dar soporte institucional a un bipartidismu caducu; y xenerar espacios alternativos plurales y coherentes”.

Les eleiciones d’esti domingu tienen qu’abrir la puerta a un proyeutu ganador de cambéu y rexeneración democrática na nuesa Comunidá sigún ellos y “esto pasa por que’l binomiu PSOE-PP y el recambiu trampa de Ciudadanos tengan los menos sofitos posibles y que tres el 20-D les fuerces polítiques y ciudadanía que suaña con una Asturies igualitaria y próspera empecipiemos yá nuesa propia marea”.

Les propuestes cimeres que se planteguen los firmantes del manifiestu son les que vienen darréu:

– Tresformar radicalmente’l nuesu modelu democráticu avanzando escontra una democracia participativa qu’arrampuñe a les instituciones el monopoliu de la política, y romper d’esta manera’l paradigma básicu del estatus surdíu nel Estáu Español nel añu 1978. Abrir un procesu constituyente qu’estableza métodos d’intervención directa de les persones nes decisiones polítiques y qu’amás garantice la pluralidá nes instituciones por aciu formules electorales realmente proporcionales y representatives.

– Romper el candáu impuestu pola FSA-PSOE tres estos casi 32 años de monopolización del poder en Asturies. Abrir un procesu constituyente en Asturies esixe osixenar la política asturiana acabando coles práutiques caciquiles y provincianes; creenos que somos un pueblu capaz de construyir un futuru d’igualdá y xusticia, lo qu’esixe ampliar el nuesu autogobiernu, superar el bipartidismu y asumir que sostener institucionalmente a la FSA ye incompatible col cambéu y la rotura democrática.

– Enchir a la llamada clase política dende la ciudadanía, abriendo les instituciones y poniéndoles al serviciu de la mayoría social. Ello esixe empoderar a la ciudadanía, reforzar l’autonomía y fortaleza de los movimientos sociales y afitar fuerces polítiques rupturistes coherentes, lo que, ente otres coses, implica centrar l’aición política no social y non no institucional, desprofesionalizar y evitar la eternización y acumuladura de cargos, nun depender financieramente de les entidaes bancaries o establecer toma de decisiones y elección de persones mediantes mecanismos horizontales y abiertos.

– Usar el poder publico pa poner la economía al serviciu de les persones y non de les élites, asegurando la sostenibilidá social y ambiental del nuesu territoriu y ciudadanía.

Loading Facebook Comments ...