Un artista francés ta esta selmana zarráu nuna roca

El Palaciu de Tokio de París abrió la primer selmana de febreru una esposición que quier amosar la relación del ser humanu cola realidá y los sos oxetos pero’l momentu más llamativu va vivise esta selmana col ermitañu ‘performer’ franches Abraham Poincheval zarráu dende’l día 23 nuna roca.

Una enorme roca de 12 tonelaes va ser el llar d’esti artista toa esta selmana cabera de febreru. Quier “esperimentar la temporalidá del reinu mineral” y por eso pretende aguantar una selmana nun buecu onde cabo’l so cuerpu y pocu más. Hasta agora la enorme roca taba espuesta partida pola metá, pero güei espérase que se xunan los dos metaes con Poincheval dientro.

Considérase un amante de les esperiencies estremes y discípulu de Marina Abramovic, de la que foi asistente. Va tar solu nesta aventura, con un pocu d’agua, carne seco y sopes. Cuenta con un pequenu conductu p’alendar, otru a manera de bañu y un teléfonu móvil por si surde dalguna emerxencia.

L’encierre na roca va filmase por que quede constancia del so día ente día. Anque l’espectáculu de Abraham Poincheval nun va terminar el 1 de marzu cuando lu saquen del morrillu. Tien previstu tornar el 29 de marzu al Palaciu de Tokio pa guarar una docena de güevos ente trés y cuatro semana. Salir de la roca va ser pa él como romper el cascarón y lo siguiente ye facilitar el camín a otros pitucos de verdá. Pa esta segunda parte, l’artista francés va empezar una dieta especial rica en jengibre pa poder caltener los güevos a una temperatura de 37 graos. Va Tar guarando los güevos 24 hores y solo va folgar 30 minutos. Una vegada que nazan los pitucos, Poincheval anunció que van vivir en casa de los sos padres.

Pa ilustrar el so trabayu, el muséu espunxo estos díes los escasos elementos materiales necesarios pa crear “Pierre” (Piedra) y “Oeuf” (Güevu), y dalgunos procedentes d’anteriores fazañes como “Gyrovague”, cilíndricu habitáculo de metal y al empar vehículu col que realizó un Viaxe invisible” polos Alpes ente 2011 y 2012.