Un alderique sobre festivales y un conciertu d’Akort y Rabia Xabaz protagonicen la edición asturiana del EHrZ

15 abril 08:40 2015 Imprimir

Un alderique sobre festivales y un conciertu d’Akort y Rabia Xabaz protagonicen la edición asturiana del EHrZ que va celebrase en La Llegra y Lata de Zinc d’Uviéu 24 d’abril. Una xornada que naz de la collaboración ente’l festival Euskal Herria Zuzenean (el festival más importante del País Vascu francés-) y l’asociación Ixuxú Asturies-Euskal Herria elkartea, asociación de xente asturiano emigrao al País Vascu que fai de ponte sociocultural ente los dos pueblos.

El 24 d’abril Uviéu va acoyer una xornada con dos partes: un alderique nel Llar La Llegra sobre modelos de festivales y un conciertu en Lata de Zinc colos navarros Akort y los asturianos Rabia Xabaz.

Con esta actividá cellébrase la fase asturiana del EHrZ, concursu internacional de música en llingües minorizaes qu’esti añu tresciende al propiu festival d’Iparralde y va tener ediciones n’otros llugares. N’Asturies Ixuxú exerció de xuráu y escoyó pa tocar n’Uviéu a Akort, grupu navarru que tan acabantes de sacar un destacáu trabayu caracterizáu por una potente base rítmica con sonoridaes rock y metal, amás de dos voces femenines al frente.

La pata asturiana van ponela Rabia Xabaz, banda hardcore n’asturianu de Pénxamu qu’anguaño s’alcuentren preparando lo que va ser el so primer discu. Lata de Zinc va acoyer esti conciertu el próximu vienres 24 d’abril a les 22.00. El preciu d’entrada ye la voluntá.

Enantes del conciertu va haber un alderique sobre modelos de festivales n’Asturies. Nél va cuntase cola presencia d’organizadores de festivales del país; amás de tar prevista la participación de persones que formen parte del EHZ. L’alderique ye abiertu a tola xente que se quiera averar al Llar La Llegra dende les 19 hores.

  Categories:
Loading Facebook Comments ...