Un actu académicu remocicáu convoca a los asturianos el vienres al Día de les Lletres

03 mayu 19:54 2017 Imprimir

Na mañana d’esti miércoles, 3 de mayu, nel llar de l’Academia de la Llingua Asturiana diose conocencia de la estructura que tendrá’l Día de les Lletres Asturianes que va celebrase’l vienres 5 de mayu a les 20,30 hores nel Teatru Campoamor d’Uviéu, al tiempu que se presentaba’l medayón distintivu del Premiu Nacional de Lliteratura Asturiana.

Como se sabe, coincidiendo col Día del les Lletres Asturianes fairáse entrega del PREMIU NACIONAL DE LLITERATURA ASTURIANA al escritor D. Xuan Bello. Tamién esi mesmu día va facese un homenax al papel xugáu pola muyer nel caltenimientu de la llingua asturiana a lo llargo de la historia.

Pues bien, nesta rueda de prensa presentábase’l MEDAYÓN DISTINTIVU DEL PREMIU (obra diseñada pol artista asturianu Adolfo Manzano) y dábase tamién a la conocencia de la prensa la edición de la ESBILLA LLITERARIA_ del autor galardonáu, ye dicir, el llibru nel que se recueye una amuesa antolóxica de la so obra. Asina mesmo, como n’otres ediciones, presentábase’l númberu 33 de la revista LLITERATURA, REVISTA ASTURIANA DE LLITERATURA, qu’esti añu ta dedicáu dafechu a la lliteratura fecha por muyeres.

Nel actu de presentación intervinieron  Ana Cano, Presidenta de l’Academia de la Llingua Asturiana y Xosé Antón González Riaño, Vicepresidente de la institución.

La presidenta de l’Academia de la Llingua Asturiana, Ana Cano, entamó recordandoque la edición 2017 del Día de les Lletres, que se va desenvolver el próximu vienres, va ser posible gracies al Conveniu de Collaboración que la Institución tien robláu col Conceyu d’Uviéu, ante’l retrasu de los pagos presupuestarios del Executivu autonómicu. Señaló que’l Conveniu de Collaboración col Conceyu y cola Universidá d’Uviéu faen posible que se faigan actividaes como los cursos de la Universidá Asturiana de Branu (Uabra) o les Xornaes d’Estudiu que tolos años celébrense na seronda.

Esplicó que l’Academia vivió una situación angustiosa, porque el Gobiernu asturianu quería “tresformanos nuna sociedá privada, como cualquier asociación, y nós por eses nun pasamos”. Per otra parte, Cano amosó’l so deséu de que Javier Fernández allegue a la ceremonia del vienres. Yá lo fixera una vegada, pero como secretariu xeneral de la Federación Socialista Asturiana. Hasta agora solo un presidente del Principáu allegó, y foi Pedro de Silva nos años ochenta. Pa Cano, el Día de les Lletres tendría de ser el principal festexu de los asturianos y tendría d’ocupar el primer puestu nel orde del día del mandatariu rexonal.

 

  Categories:
Loading Facebook Comments ...