Últimos díes de visites guiaes al Centru d’Arte de la Cueva del Pozu’l Ramu/Tito Bustillo

26 agostu 10:24 2010 Imprimir

El Gobiernu d’Asturies vien organizando visites guiaes al Centru d’Interpretación del Arte Rupestre de la Cueva del Pozu’l Ramu/Tito Bustillo nes selmanes últimes, dempués de les obres feches nel llugar, con un presupuestu global de 8.784.677,59 euros. Les reserves anticipaes puen facese llamando al teléfonu 902 306 600, terminando’l plazu’l 29 d’agostu.

L’edificiu ye de nueva planta y ta allugáu nun espaciu mui ampliu, na vera izquierda del ríu Seya. Tien tres plantes pa espacios espositivos, d’atención al públicu (recibidor, tienda, cafetería, biblioteca, sales d’esposiciones permanentes y temporales); y espacios p’almacenes y talleres. L’oxetivu ye tresformar el Centru nun polu d’espardimientu de la bayura arqueolóxica d’Asturies.

Amás d’estes visites guiaes, la Conseyería tamién tien abierta tol añu l’aula didáutica de la Cueva del Pozu’l Ramu/Tito Bustillo de miércoles a domingu, ente les 10.00 y les 16.45 hores. Ye d’accesu llibre y de baldre, pero ye preciso sacar la entrada na taquilla d’accesu a la Cueva. En cuantes a les visites a la propia Cueva, l’apertura al públicu ye namás pelos meses d’abril a setiembre (n’iviernu ta pesllada), de miércoles a domingu ente les 10.00 y les 16.30 hores, con un cupu máximu de 360 visitantes. Repártense nun máximu de quince pases diarios, d’alredor d’una hora.

La Cueva del Pozu’l Ramu/Tito Bustillo alcuéntrase ente los conxuntos rupestres paleolíticos más importantes del Cordal Cantábricu. El 7 de xunetu de 2008, el Comité Permanente de la UNESCO incluyó esti xacimientu nel so seleutu llistáu de patrimoniu mundial xunto a otres cuatro cueves asturianes (El Pindal, La Peña, Llonín y La Covaciella) y nueve más de Cantabria y el País Vascu.

  Categories:
Loading Facebook Comments ...