Portada Fiestes Últimos díes de los XII Alcuentros cola cultura tradicional d’Asturies en Colunga

Últimos díes de los XII Alcuentros cola cultura tradicional d’Asturies en Colunga

by asturnet

Redacción.

Los Alcuentros cola Cultura Tradicional d’Asturies, que vienen teniendo llugar dende’l 12 de xunetu pasáu, van terminar esta fin de selmana colo últimos actos. Los Alcuentros tán organizaos pol Ayuntamientu de Colunga al travies de la Estaya de Cultura. Güei vienres a les diez de la nueche va entamar la fin de selmana con una actuación del Grupu de Teatru Xana, que presenta los entremeses, con un versión n’asturianu, ‘El vieyu celosu’ de Cervantes y ‘Mancebu que casó con muyer brava’ d’Alejandro Casona, dambes dos na Sala Loreto.

El sábadu a les 11 la nueche va entamar la Nueche Folk colos grupos Ibur y Merlín. Esta nueche folk va ser darreu de la XII Amuesa de Bailles Rexonales qu’organiza’l Grupu Folclóricu “Xagardúa” de Colunga, el Coro Manín de Llastres y el cantante de tonada asturiana, Manolo Roza, de Llibardón.

A lo llargo de mañan sábadu y del domingu, na Plaza del Ayuntamientu, va celebrase’l III Mercáu Tradicional nos Alcuentros, cola colaboración de Producciones Nun Tris. Esti mercáu inclúi puestos d’esposición y venta de productos d’artesanía y alimenticios típicos d’Asturies, talleres d’oficios tradicionales en vivu, actuaciones musicales y folclóriques, xuegos tradicionales y acciones teatrales.

Amás, nel salón d’actos de la Casa de Cultura de Colunga, van poder visitase a lo llargo de los Alcuentros una amuesa de los trabayos realizaos nel taller de cueru y manualidades organizáu pola Estaya de Cultura del Ayuntamientu ente los meses de febreru y xunu.

Tamién te podria gustar