Ultimáu’l recorríu de la manifestación del 24-11

by asturnet | noviembre 2, 2007 12:35 am

El Conceyu Abiertu pola Oficialidá entamó estos díes la campaña de convocatoria pa la movilización del sábadu 24 de payares col repartu de cien mil sobres de zucre rotulaos n’establecimientos hosteleros de toa Asturies del que ya diere cuenta Asturnews, pero amás yá tien preparada la organización de les marches que van aportar a Uviéu esi día dende estremaos llugares d’Asturies.

Les seis marches a pie dende Xixón, Avilés, La Pola Siero, La Felguera, Mieres y Trubia que van aportar a Uviéu tienen un horariu qu’entama en dalgunos casos a les nueve la mañana pa poer llegar a les seis de la tarde a la Estación del Norte na capital uvieina.

Sigún informa esti día’l blog “fueyaenblancu”[1]la marcha de Xixón va salir a les 9:30 de la Gasolinera Foro; la d’Avilés a les 9:00 d’El Parche; la xente del oriente ta convocáo a les 12:30 na Plaza Mayor de La Pola Siero. A les 11.00 nel Parque Vieyu de La Felguera saldrá la marcha del Nalón; La del Caudal será a les 12:30 dende la Plaza l’Ayuntamientu. La xente del occidente aconceyará en Trubia pa salir a les 12.00 dende l’Institutu. Asinamesmo, les marches de Xixón y Avilés alcontraránse en Llugones a les 16:00; la de La Pola y La Felguera alcontraránse en Fonciello a les 14:00. La marcha del Caudal va tener el puntu d’alcuentru en Les Segaes a les 16:30 y la marcha de Trubia fará parada en San Cloyo a les 14:30.

Toles marches llegarán a la plaza la Estación del Norte a les 18:00, hora del entamu de la gran manifestación. El grupu La Bandina va actuar dando’l cierre a esta xornada reivindicativa.

Endnotes:
  1. “fueyaenblancu”: http://fueyaenblancu.nireblog.com

Source URL: http://asturnews.com/ultimaul-recorriu-de-la-manifestacion-del-24-11/