Onde yéramos pocos… El TSXA anula la ordenanza del asturianu de Noreña

Onde yéramos pocos… El TSXA anula la ordenanza del asturianu de Noreña
03 xineru 19:08 2018 Imprimir

La sala contencioso-alministrativa del Tribunal Superior de Xusticia d’Asturies (TXSA) y el PP echen un gabitu al Proyectu 2018 de la Xunta pola Defensa de la Llingua Asturiana(XDLA): si nun se duldaba de la marxinación del asturianu nel marcu xurídicu d’anguaño, el TXSA anulaba esta selmana la Ordenanza d’Usu del Asturianu que Noreña aprobó n’Ochobre de 2016 y el PP anunció que va vixilar a los conceyos pa que nun tean llibertá d’aporbar ordenances.

Talamente como si los astros se punxeran d’alcuerdu l’añu del Proyectu 2018 col que la XDLA quier algamar que se reforme l’Estatutu d’Astonomía reconociendo la oficialidá del asturianu, el TSXA anulaba nel entamu del añu a Ordenanza d’Usu del Asturianu que Noreña aprobó n’Ochobre de 2016 y que fore recurrida pol PP. Facíalo por considerar que nun s’axusta a derechu, polo que da la razón a tolos que dende la sociedá civil cansen dia tres día de dicir que sin la oficialidá la persecución del usu normal del asturianu ye daqué que sigue produciéndose cadía.

La situación ye tan ablucante, que darréu de la sentencia, el PP dixo que va vixilar que dengún conceyu puea ordenar l’usu del asturianu cooficial “esi construíu por unos pocos”, colo que da a entender que depende de la variante d’asturianu que se regule en cada conceyu pue ser llegal o non y sofitáu pol PP o lleváu ante los tribunales, convirtiendo’l so puntu de vista filolóxicu na única verdá llingüística, a la escontra de lo qu’opinen los especialistes, la Universidá y toles instancies académiques.

L’ataque del PP escontra la llingua asturiana, mientres sofita, subvenciona y esparde l’usu del gallegu o del valencianu entama a ser un xemplu d’esquizofrenia qu’Asturies nun pue siguir soportando, colo que dexa nel teyáu de les otres polítiques d’izquierdes que dicen sofitar la oficialidá y de Foro Asturies que lo lleva nel so programa acabar con esti conflictu o convertilu en daqué esmolecedor pala convivencia de los asturianos, que ye lo que parez pretender el PP aprovechando la fola anticatalanista que vien desatando en tol Estáu.

Esti ye unu nuevu ataque a l’autonomía de los conceyos pa establecer midíes de normalización del asturianu, tal y como afita la Llei d’Usu del asturianu de 1998 que nel puntu 1 del Artículu 8 diz que los ayuntamientos asturianos podrán adoptar les midíes necesaries p’asegurar la efectividá del exerciciu de los derechos llingüísticos qu’esta Llei otorga a los ciudadanos residentes n’Asturies, lo que dexa a les clares la posibilidá de poner en marcha midíes, esactamente lo que se fai al traviés d’una ordenanza de normalización. Agora”l TXSA vien a decir que la Llei d’Usu nun ye abondo pa protexer l’emplegu del asturianu llibremente na Alministración, colo que dexa bien a les clares que l’asturianu ta siendo marxináu frente a otres llingües del Estáu pol fechu de nun ser oficial.

  Categories:
Loading Facebook Comments ...