TVE estudia entamar una programación especial pa conmemorar los 30 años de Conceyu Bable

El centru territorial de Televisión Española n’Asturies, dirixíu pol periodista Pedro Alberto Marcos, ve con bonos güeyos una posible programación especial con ocasión del 30 aniversariu de la hestórica asociación Conceyu Bable, que va cellebrase a finales de payares con un programa qu’inclúi, nel so primer borrador, una esposición, una conferencia y tres conciertos.

Magar que los organizadores de les cellebraciones, alitaes pola Oficina de Política Llingüística’l Principáu col sofitu d’otres entidaes, manexen entá un programa embrionariu qu’ha ser negociáu con ayuntamientos ya instituciones, nesi proyectu despunten un gran conciertu final n’Uviéu el vienres 26 de payares con participación d’artistes del Resurdimientu y otros dos posibles recitales, ún de Carlos Rubiera en Xixón y otru centráu nel rock fechu n’asturianu, con allugamientu inda por concretar.

Si prosperen les intenciones de los organizadores de la efemérides, les tres décades de vida de Conceyu Bable cellebraránse amás con una esposición de llibros en llingua asturiana, una conferencia al rodiu la nueva lliteratura, una amuesa d’artes plástiques y estremaes actividaes de música folk y tonada.

Conceyu Bable echó a andar nel añu 1974 cola revista ‘Asturias semanal’ como epicentru de les sos reivindicaciones y la defensa de la llingua asturiana por bandera. Na asociación confluyeron los pioneros del movimientu asturianista, que col pasu’l tiempu ramificóse n’estremaos collectivos y corrientes y vio aselecer la que ta considerada como la so organización fundacional.