‘Tres anuncios en las afueras’, gran trunfadora nos Bafta

19 febreru 12:48 2018 Imprimir

Tres anuncios en las afueras“, con cinco Bafta, foi esta fin de selmana la gran trunfadora na 71 edición de los premios de l’Academia británica, que reconocieron el trabayu del mexicanu Guillermo del Toru por La forma del agua, que se llevó’l galardón a meyor director.

El filme del británicu Martin McDonagh consiguió cinco de les nueve ‘mázcares’ a les qu’optaba, nuna ceremonia que dio’l llombu a La forma del agua y a L’intre más escuru, qu’entamaron la velada con 12 y nueve nominaciones, respectivamente.

Meyor película, meyor actriz (Frances McDormand), meyor actor secundariu (Sam Rockwell), meyor guion orixinal y meyor película británica fueron les cinco categoríes nes que s’impunxo “Tres anuncios en las afueras“, a la que siguió por númberu de premios La forma de l’agua, que se llevó trés, y “L’intre más escuru”, y “Blade Runner 2049”, con dos cada unu.

Tres anuncios en las afueras, cinta escrita y empobinada pol inglés McDonagh, xira en redol a la hestoria de Mildred Hayes, una madre qu’arrienda trés abarganes d’anuncios para llamar l’atención sobro’l crime ensin resolver del que la so fía foi víctima. La obra de McDonagh, que yá ganó’l Globu d’Oru a meyor película’l mes pasáu, postúlase según máxima favorita pa conquistar el preciáu Óscar nesta mesma categoría na ceremonia del próximu 4 de marzu.

El mexicanu Guillermo del Toru cumplió colos pronósticos na categoría de meyor director y, cola fantasía romántica que ye La forma del agua, llevóse’l Bafta, el segundu que gana tres el llográu en 2007 por El llaberintu del faunu” na categoría de meyor película de fala non inglesa. La forma de l’agua, qu’empezó la nueche aspirando a 12 premios narra la hestoria d’una llimpiadora muda que trabaya nun llaboratoriu d’alta seguridá del gobiernu mientres la Guerra Fría y namórase d’una criatura humanoide-anfibia prindada.

Nun hubo llugar pa les sorpreses nes categoríes de meyor actor y meyor actriz protagonista, y tantu Gary Oldman, pol so papel de Winston Churchill en “L’intre más escuru”, como Frances McDormand, pola so interpretación de Mildred Hayes, lleváronse’l Bafta a casa.

  Categories: