Portada Conceyos Trescorrales acueye hasta’l 28 d’agostu la esposición “Bicis pa la hestoria”

Trescorrales acueye hasta’l 28 d’agostu la esposición “Bicis pa la hestoria”

by redacción asturnews

Trescorrales acueye dende esti xueves 8 hasta’l 28 d’agostu la esposición “Bicis pa la hestoria.”Na amuesa podrán contemplase una ventena de bicicletes de coleccionista coles que se repasen 100 años d’hestoria d’esti mediu de tresporte que contribuyó a la movilidá autónoma y a la llibertá de la muyer, al favorecer cambeos radicales nel vestuariu.

El conceyal de Cultura, Jose Luis Costillas presentó esti miércoles la esposición “Bicis pa la hestoria” que va acoyer la plaza Trescorrales del 8 al 28 d’agostu. Una “introspeición na hestoria de la bici nos postreros 100 años” indicó’l conceyal, que dexará afayar 20 pieces de coleccionista que van faer les delicies de tolos visitantes”. Ente elles, Costillas quixo destacar la Pinarello cola que Miguel Indurain dio les sos últimes pedalaes como profesional na Vuelta de 1996 y delles bicicletes utilizaes con fines bélicos, como les destinaes a tresportar armes y pertrechos na guerra de Vietnam.

Xuntu al conceyal, el comisariu de l’amuesa, Ángel Mato y l’exciclista y periodista José Enrique Viso, esplicaron los detalles de la esposición, estremada en trés secciones: na primera d’elles recuerda la importancia de la bicicleta na hestoria contemporanea, yá que dende finales del sieglu XIX y principios del XX, foi’l mediu individual de tresporte por excelencia que contribuyó a la movilidá autónoma, a la llibertá de desplazamientu y provocó cambeos radicales nel vestuariu femenín, avanzando na igualdá ente homes y muyeres. Pa ilustrar el protagonismu de la bici na hestoria contemporanea espónense un velocípedu francés Larippe, dos bicicletes ensin cadena del sieglu XIX, una Automoto masculina francesa (1922) y la femenina Skandia de fabricación alemana (1928). El ciclismu de competición va tar representáu por una Peugeot de pista de 1901, una Humber inglesa de 1910 y la bicicleta de carrera La Rafale, de fabricación francesa (1930). El ciclismu nes guerres béliques va recordase con una pieza militar suiza de 1933. La importancia de la bici n’Asia va amosar cola china Flying Pigeon, de la que se producieron más de 500 millones d’unidaes, y con una caduca y reforzada bici vietnamita, retruque de les que s’usaron pa tresportar armes y pertrechos mientres la Guerra del Vietnam.

Na segunda sección de l’amuesa, va representase’l papel d’Asturies y Uviéu na hestoria de la bicicleta. El Principáu foi, dende finales del sieglu XIX, un territoriu aparente pa esti mediu de tresporte, tanto pal desplazamientu llaboral como pa la escursión y la práctica deportiva. Los velocípedos llegaron al Teatru-Circu de Santo Susana d’Uviéu en 1886 y un añu dempués per San Mateo corrieron les primeres competiciones n’El Bombé.  Na esposición va amosase tamién l’aportación d’Asturies a la fabricación de bicicletes con modelos propios que s’afaíen a la durez de les maltrechas carreteres cantábriques. Los pioneros fueron los hermanos Cuesta, cola marca Bicicletes Cuesta, que funcionó en Xixón dende 1910 produciendo más de 2.000 pieces (de les que s’esponen dos) y foi la única fábrica del norte d’España hasta la creación en Eibar de BH (1923) y Orbea (1926).  Dende 1930 tamién funcionó n’Uviéu, Industries Teide, onde se fabricaben y montaben bicicletes.

Na última sección de la esposición amosaránse cinco bicicletes profesionales rellacionaes con Asturies: la Llamera, cola que trunfó Marín Lejarreta na primer xubida a Los Llagos de la Vuelta a España en 1983; la Pinarello qu’utilizó Miguel Indurain na so última participación como profesional na Vuelta 1996; la Gios cola que Chechu Rubiera consiguió la victoria dean Les Dolomites mientres el Xiru de 1997;  la Colnago de Tony Rominger, xefe de files mientres delles temporaes del equipu asturianu CLAS, y el retruque de la Orbea cola que l’uvieín Samuel Sánchez ganó l’Oru Olímpico nos Xuegos de Pequín.

La esposición va poder visitase del 8 al 28 d’agostu na Plaza de Trascorrales, de llunes a sábadu, n’horariu de 11:00 a 14:00 y de 17:00 a 21:00 hores.  La inauguración celebrará’l xueves, a les 13:00 hores.

Tamién te podria gustar