Trescorrales acueye la II Edición de la Feria Nacional d’Arte Gráfico “Ciudá d’Uviéu”

Trescorrales acueye la II Edición de la Feria Nacional d’Arte Gráfico “Ciudá d’Uviéu”
27 setiembre 15:24 2018 Imprimir

Trascorrales acueye, esta fin de selmana, la II Edición de la Feria Nacional d’Arte Gráfico “Ciudá d’Uviéu”: Alma Gráfica. Va Haber 33 espositores, artistes de too el país, talleres y, como convidaos especiales, ente otros, Alan MK Kabrito ya Iván Riaa, fundadores del Taller de Grabáu y estampación La Chicharra, con see en Oaxaca, (México).

El conceyal de Cultura y presidente de la Fundación Municipal de Cultura, Roberto Sánchez Ramos presentó esta selmana, en rueda de prensa, la II Edición de la Feria Nacional d’Arte Gráfico ‘Ciudá d’Uviéu’, Alma Gráfica. El conceyal tuvo acompañáu de la directora del certame, Marta Fermín, que se va celebrar na plaza de Trascorrales, esta fin de selmana, los díes 28, 29 y 30.

L’oxetivu d’Alma Gráfica ye ufiertar a los artistes y editores una redolada onde dar a conocer les sos ediciones y ponelos en contactu colos coleccionistes y el públicu en xeneral, cola fin d’abrir espacios de reflexón sobro la cultura contemporanea, velar pola presencia de les publicaciones de el editores y artistes nel circuitu internacional, ampliar el mercáu de la edición y, a última hora, reconectar les artes y l’edición cola sociedá.

Les múltiples aguaes d’especialización dientro del campu del Arte Gráfico fai d’esta Feria un puntu d’alcuentru pal siguimientu de la formación, producción propia, exhibición y espardimientu artísticu, configurando l’eventu como un alcuentru interdisciplinar con un ámbitu d’actuación que supera les llendes locales, p’asitialo ente los principales referentes d’alcuentru nacional ya internacional d’esti sector. “Esta Feria va incluyir talleres y conferencies bien centraes nos profesionales. Ye un pasu importante pal arte gráfico y el sofitu institucional del Conceyu debería de consolidase yá que Asturies ye un referente internacional n’arte gráfico. Como conceyal de Cultura siéntome satisfechu de sofitar con escasos 19.000 euros esti certame”, aseguró Sánchez Ramos.

Marta Fermín repostió qu’Alma Gráfica axunta les colecciones nacionales d’arte gráfico más interesantes del país. “Amosaron muncho interés munchos artistes de tol país. Asturies tien una gran cantera na Escuela d’Arte d’Uviéu. Ye d’accesu llibre porque queremos dexar claro que ye profesional pero abierta a tol mundu que va poder ver trabayos bien especiales”.

Yá na so primer edición, la Feria convertiérase en referente a nivel nacional tantu poles cifres d’asistencia de públicu como por participación de profesionales del sector, tando presentes entós talleres y artistes de too el país. 42 espositores y cinco conferencies formaron la programación de la que pudo esfrutase nesos díes na capital asturiana. Artistes, revistes y páxines de referencia especializaes del sector fixeron ecu del eventu y encamentar al traviés de los sos medios, recibiendo bones crítiques y gran sofitu.

Pa esta segunda edición d’Alma Gráfica cuenta cola ayuda y collaboración de la Fundación CIEC (Centru Internacional de la Estampa Contemporanea d’A Coruña), que va otorgar a unu de los participantes de la Feria les Beques ALMA GRÁFICA” pa realizar cursos d’alta especialización nel so Centru.

Asturies ye dende hai más de 100 años un referente no que se refier a les Artes Visuales nel terrén del Grabáu, la Edición d’Arte y l’Arte Múltiple. La recepción y espardimientu de la litografía n’Asturies tuvo nel sieglu XIX un calter escepcional y tuvo estrechamente amestada al procesu d’espansión de les enseñances artístiques, a la divulgación de los sistemes fabriles utilizaos na siderurxa y a la necesidá de dar respuesta a la creciente demanda comercial. La litografía tuvo xuna importancia capital nel desenvolvimientu del sector gráficu rexonal a lo llargo de los sieglos XIX y XX.

PROGRAMA

Vienres 28 de Setiembre

18:00 Apertura.
20:00 Inauguración oficial.

Sábadu 29 de Setiembre

11:30 Taller “Dar la chapa” Espaciu de Creación y Didáctica.
VITRINA Taller Creativu. Xixón.

12:30 Charra, Fundación CIEC centru de creación y alcuentru.
Pedro Galilea Director Centru Internacional de la Estampa Contemporanea. Betanzos. A Coruña.

13:30  Conferencia-Técnica “Tradición ya innovación nel Grabáu”.
María Pujol, Grabadora y Directora de Manera Negra.
Taller de Grabáu y estampación Manera Negra, Barcelona.

17:30 Proyección-Didáctica “Fotopolímero  y métodos tradicionales nel grabáu”.
Paco Aguilar, artista y director del taller Gravura de Málaga.

19:00 Alcuentru con Brita Prinz invitada especial d’Alma Gráfica 2018.
Coleccionista y Directora del la Galería Brita Prinz. Madrid.

20:00 Presentación de la Carpeta d’Obra Gráfica del Taller Pez Soluble de Méjico.
Al cargu de José Rincón, artista grabador.

Domingo 30 de Setiembre

11:30 Taller Fundamento y demostración de Tipografía Artesanal. Composición manual con tipos de chombu y madera.
Álvaro Baena Sabugu Director Litografía Viña. Xixón.

12:30 Charra” Un camín escontra la encuadernación creativa”.
Ana Caballero, Taller La Maga. Xixón.

13:30 Atopo-Conferencia con Alan MK Kabrito ya Iván Riaa, convidaos especiales d’Alma Gráfica 2018.
Artistes grabadores y fundadores del Taller de Grabáu y estampación La Chicharra, con see en Oaxaca, México. Especialistes en xilografía y gran formatu.

17:30 Conferencia OPEN PORTFOLIO Programa d’artistes emerxentes
David Arteagoitia, Artista y Director del Programa Open Portfolio. Profesor de Grabáu pola UPV/EHU.

19:00 Conferencia-Técnica: “Aguatinta. Grases sobrelacadas”.
José Rincón Artista, grabador  y director del Taller José Rincón. Madrid.

20:00 Entrega de la Beca Fundación CIEC a unu de los artistes representaos na Feria.

20:30 Despidida Oficial d’Alma Gráfica 2018 a cargu del equipu técnicu de la Feria.

  Categories:
Loading Facebook Comments ...