Trabe presenta les proses profanes de Roís de Corella

Trabe presenta les proses profanes de Roís de Corella
22 avientu 12:32 2015 Imprimir

Trabe presenta nes Navidaes la obra en prosa de calter profanu d’unu de los clásicos menos nomaos de la lliteratura catalana, Joan Roís de Corella.

Joan Roís de Corella (Valencia 1435-1497) ye, quiciabes, el menos conocíu de los clásicos de la lliteratura en catalán, pesie a formar parte d’un selectu garapiellu d’autores del llamáu Sieglu d’Oru valencianu, xunta figures tan importantes como Ausiàs March, Joanot Martorell, Isabel de Villena o Jordi de San Jordi.

Poeta y narrador, eclesiásticu y caballeru, la so obra ye abondosa y variada: relixosa y profana, d’enclín medieval y renacentista. Esta mezclienda y manera de facer de Corella faen d’él l’autor más modernu de la lliteratura en valencianu-catalán de la dómina.

Esti volume, como amuesa’l títulu, recueye namás la so obra en prosa de calter profanu, clasificada en mitolóxica, amorosa y filosófica.

El traductor ye Pablo Suárez García (Udrión, 1973), doctor en Filoloxía, inxenieru superior de Telecomunicación, llicenciáu en Ciencies Matemátiques y en Filoloxía Hispánica y especialista universitariu (máster) en Filoloxía Asturiana. Amás d’esta versión n’asturianu de la prosa non relixosa de Corella, tien tornaes a la llingua asturiana obres de gran importancia dientro la lliteratura peninsular como El Quixote, Tirán el Blancu (de Joanot Martorell), o El suañu (de Bernat Metge).

Loading Facebook Comments ...