Portada Conceyos Torna’l programa de Centros sociales d’Uviéu “Y pel branu… ¡tamién!”

Torna’l programa de Centros sociales d’Uviéu “Y pel branu… ¡tamién!”

by redacción asturnews

Torna’l programa de Centros sociales d’Uviéu “Y pel branu… ¡tamién!”, que va desenvolvese del 4 de xunetu al 31 d’agostu con decenes d’actividaes al campu. La conceyala de l’área, Lourdes García, presentó esta selmana’l programa d’actividaes.

Esta ye la tercer edición d’un programa qu’empecipiara en 2020 de resultes de la pandemia, cuando tuvimos que cerrar los centros sociales al públicu y treslladar les actividaes al campu.  Una fórmula que funcionó y que caltuvimos  de magar, porque ye una demanda que foi n’aumentu, sobremanera teniendo en cuenta que falamos de persones mayores que se sintieron más segures n’espacios abiertos. Presentamos, por tanto, una amplia gama d’iniciatives de tiempu llibre na dómina braniza diseñada tantu para para residentes como para visitantes de toles edaes”, sorrayó la edil, Lourdes García.

A partir del miércoles abrió’l plazu pa la presentación de solicitúes d’aquelles persones que deseyen acutar la so plaza en dalguna de les actividaes, que riquen inscripción. Toes, apuntó García, “tán diseñaes para realizase nel esterior, para lo qu’escoyimos diverses places, árees, parques y espacios públicos partíos nos barrios de la ciudá d’Uviéu. Son iniciatives de too tipu, bien enfocaes a la práctica del deporte y los vezos saludables, con actividaes como gerontogimnasia, baille, paseos saludables, yoguilates, y munchos más. Un total de 13 modalidaes, ente elles, delles específicamente dirixíes al públicu infantil, como un Escape Room nel Campu San Francisco, teatru de cai, los bailles d’Amador, o xuegos como’l Desafíu Trivial o L’Orixe del Camín”.

L’oxetivu, destacó la responsable municipal de Centros sociales, “ye ufiertar a los ciudadanos de toles  edaes un programa d’actividaes y exerciciu físicu y mental al campu, nel que poder interactuar con otres persones como ellos, con un importante llabor de socialización personal que tanto beneficia tantu a mayores como a mozos”.

El programa va empezar el próximu 4 de xunetu al 31 d’agostu, y va desenvolvese n’horarios diversos, estremando ente actividaes regulares (que se van realizar a lo llargo de too el branu) y otres actuaciones de calter más puntual, sobremanera pensaes pa les tardes (que nun van esixir d’inscripción previa).  En distintos localizaciones, como la plaza del Truébano, el Conceyín, la plaza de la Escandalera, el Cortixu, la plaza Juan Pablo II en Ciudá Naranco, plaza d’Italia y  más llugares.  Les places son llindaes en toles actividaes, polo que les persones comenenciudes van poder formular la so reserva de plaza al traviés de los medios qu’anunciamos nes canales y redes del Conceyu y nel teléfonu 660099199 y al traviés del mail actividadesalairelibreoviedogmail.com”, concluyó la edil.

Tamién te podria gustar