Torna la Nueche Negra a Avilés

Torna la Nueche Negra a Avilés
24 10:09 2021 Imprimir

Vuelve la Nueche Negra a Avilés, , una celebración participativa de la cultura con más de 30 actividaes na so décima edición, dempués del paréntesis de la obligada edición virtual en 2020 por causa de la pandemia del COVID-19. Va ser el próximu vienres, 26 de payares, al empezar la tarde y hasta bien entrada la nueche.

Toa forma d’espresión artística atopa acoyida y espardimientu nuna Nueche Negra que bebe del “Samhain” celta, la celebración que da pasu a los meses d’escuridá, de díes curtios y nueches llargues. Una recuperación de la normalidá col cumplimientu de toles gatantías sanitaries, en más de 30 actividaes, de la pintura a la música, la danza, la videocreación, la performance, l’arte testil amás de talleres y esposiciones para tolos públicos, con especial relevancia de los destinaos a la infancia, y distintes visites empuestes.

Les muyeres y les artistes afganes van tar presentes tamién na cai, cola reinterpretación de la obra de la grafitera Shamsia Hassani que van faer siete artistes asturianos na plaza d’España. Y tamién cola llectura del manifiestu “Filos”, una Videoperformance solidaria coles muyeres y neñes d’aquel país, y el taller “Soplíos de Llibertá”, dambos cola collaboración de la ONG.

Cola Factoría Cultural como centru neurálxicu, l’actividá va tomar tamién la cai, na plaza d’España, y abre de par en par les puertes de centros culturales como’l Centru Niemeyer, el CMAE, la Casa de Cultura, el Muséu de la Hestoria Urbana, la Escuela Cimera d’Arte d’Asturies, la Galería Amaga y Cúntame un Cuadru, nes que van tener llugar diverses actividaes.

La poderosa imaxe creada para la ocasión por Truyés, da forma al cartelu, nel que s’aldovina la batalla entre la lluz y l’escuridá, exa simbólica sobre’l que s’asitia la celebración de la cultura que tan bien festexa la Nueche Negra.

Destaquen, coles mesmes, les collaboraciones cola Escuela Cimera d’Arte d’Asturies, que’l so alumnáu reivindica a les artistes escaecíes de la Bauhaus, tres la represión nazi, gracies a la esposición-homenaxe que lleva por nome “LLUCES”. O’l desenvolvimientu de la obra colectiva “Texíu Humano”, del proyectu d’arte y tresformamientu social BERDE, impulsáu dende Asturies por María Sol Álvarez Yenes y un equipu multidisciplinar, que reivindica la creatividá de les persones con discapacidá intelectual.

Un conxuntu d’actividaes gratuites, espeyu de la vida cultural y artístico d’Asturies y Avilés. Pa participar nos talleres ye necesaria inscripción, al traviés del teléfonu 985 548 617 y el corréu electrónicu nochenegraaviles@gmail.com.

Ver programa completu