Topen el documentu manuscritu más antiguu de Gran Bretaña

Arqueólogos británicos desenterraron en Londres una tablilla de madera na que ta grabáu’l documentu manuscritu más antiguu atopáu na isla de Gran Bretaña, un rexistru de deldes datáu’l 8 de xineru del añu 57 de nuesa yera, sigún informó’l Muséu Arqueolóxicu de Londres (MOLA, n’inglés).

Mientres una escavación pa llevantar un nuevu edificiu na City de Londres, el centru financieru de la capital británica, salieron a la lluz 410 tablillas romanes, 87 de les cualos yá fueron descifraes. Ente eses tables, fabricaes en madera y que tuvieron cubiertes de cera pa poder escribir sobre elles, detectóse tamién la primer referencia conocida de Londres, fechada cincuenta año primero que l’historiador romanu Tacitus citara la ciudá n’unu de los sos escritos.

Trátase d’un afayu “descomanadamente significativu” que superó ” les mires” de los arqueólogos, sorrayó la directora de la escavación, Sophie Jackson, nun comunicáu. “Ye la primer xeneración de londinenses la que nos ta falando”, cavilgó l’arqueóloga, que señaló que cerca de 700 oxetos desenterraos nesti xacimientu van poder amosase al públicu nel futuru.

Les tablilles caltuviéronse demientres casi de 2.000 años gracies a que quedaron atrapaes ente la folla húmedo del Walbrook, unu de los ríos que cruciaba la City de Londres naquella dómina, y nun han tao en contactu col osíxenu mientres esti tiempu. Xuntu con esos documentos, los espertos atoparon tou tipu d’oxetos romanos, ente ellos cerámiques y monedes, que faciliten la datación de los escritos nos que nun apaecen feches. La cera qu’un día anubrió les tablilles sumió, polo que solo queden delles marques na madera, polo que los especialistes tienen de descifrar les antigües palabres a partir d’unos pocos trazos.

Unu de los testos descubiertos ye un contratu fecháu’l 21 d’ochobre del añu 62 pa tresportar “venti cargues de provisiones” dende Verulamium (anguaño la localidá de St Albans) hasta Londres. Roger Tomlin, llatinista de la Universidá de Oxford que descifró dalgunes de les tablillas, detalló cómo los documentos faen referencia a entregues de cerveza, sentencies xudiciales, ordes militares y contienen hasta práctiques de caligrafía.

Londres yera entós “la frontera nel oeste del Imperiu Romanu -describió Tomlin-. La xente llegaba xusto detrás del exércitu romanu y trataben d’esplotar la nueva provincia”, rellató l’espertu universitariu.