Tino Casal ye nomáu Fíu Predilectu d’Uviéu a títulu póstumu

27 setiembre 14:54 2018 Imprimir

Un salón de plenos completu foi l’escenariu esta selmana de la concesión de Fíu Predilectu a títulu póstumu a Tino Casal. L’actu empezó cola bienvenida del Alcalde, Wenceslao López, “n’especial a los sos familiares y amigos”.

De siguío, el secretariu municipal lleó l’alcuerdu plenariu de 2016 nel que la Corporación, por unanimidá, aprobó’l 20 d’ochobre de 2016, la concesión d’esti Honor y Distinción a Tino Casal, “un vecín de Tudela Veguín que con solu 12 años empezó nel mundu de la música, primero con Zafiles Negros y depués Archiduques y que 16 años dir a Londres. Un artista integral, autor de les sos obres, de les sos lletres, de los sos traxes, carátulas de los sos discos… tou que güei fadríen unos 20 profesionales, un exemplu de persona, d’amistá y arrogancia”.

L’amigu de Tino Casal, el productor cultural Javier Grela Fernández foi l’encargáu de glosar la so figura. A los 27 años de la so muerte, aseguró, “con él foi’l talentu, la so obsesión pel mundu oriental, el so enfotu en faer’ La Pantasma de la ópera’ con Miguel Ríos (…) Esti guah.e de Tudela Veguín yá apuntaba maneres cuando con solu 12 años montó un teatru nel patiu d’una vecina. Foi’l primeru en fundir la gaita nos sos cantares y tornó de Londres convertíu nun ser únicu, auténticu. Celestino Casal Álvarez yá yera un asturianu universal, un creativu llibre que faía de too porque-y encantaba crear. Productor de Obus, d’Azul y Negru ya inclusive de películes de Pedro Almodóvar, 27 años dempués de la so muerte esisten persones, y non solo n’Asturies o n’Uviéu, que fueron arimaos por el so estilu de vida… dacuando cuando te namores hai que saber ente llínees”. Y entós Grela remató la so intervención filando fragmentos de los sos más conocíes cantares, “les d’un furacán profesional que vien y va buscando acción”.

L’Alcalde, “arguyosu como primer edil y como vecín d’Uviéu por esti nomamientu” definió al homenaxáu como “embaxador d’Uviéu y Asturies na movida madrilana” y aseguró que “falar de Tinu Casal ye falar de música, de creación, de talentu… Foi un home demasiáu avanzáu pal so tiempu, el Rei del Glam’, un tronu qu’ocupó ensin dexar de llau la so identidá rexonal. La persona superaba en demasía al personaxe, un uvieín coetaneu mio que nos dexó con 41 años, defensor de la espontaneidá como forma de vida y  exemplu de superación”. “Espero qu’esti nomamientu sirva pa fortalecer la so memoria”, concluyó Wenceslao López. Y de siguío fixo entrega del pergamín del Títulu de Fíu Predilectu, decoráu nesta ocasión con una sacavera n’honor al homenaxáu, a la sobrina de Tinu Casal, María Suárez Casal. “Ye un arguyu recibir esta distinción porque’l mio tíu, Tinu, sentíase fondamente arguyosu de la so tierra. Espero que bien llueu tengamos un llugar n’Asturies pa esponer esti títulu”. Nesi momentu, ente’l públicu, l’artista Jacobo Cano empezaba a entonar, a capela, los primeros acordes de “Eloise”, el cantar de Tinu Casal qu’entá güei ocupa’l segundu puestu nel ranking nacional de les grandes temes españoles.

  Categories: