The Soulbreaker Company y Aftermaths empecipien esti vienres el ciclu Factoría Sound

The Soulbreaker Company y Aftermaths empecipien esti vienres el ciclu Factoría Sound
09 marzu 08:57 2017 Imprimir

Esti vienres 10 de marzu, a partir de les 21 hores, entama’l ciclu de concierto Factoría Sound, que va llevar hasta l’escenariu de la Factoría Cultural d’Avilés a un total de seis bandes d’oldeada calidá destacaes nos sos respectivos estilos musicales.

Los encargaos de llevantar el telón d’esti programa d’actuaciones van ser los vitorianos The Soulbreaker Company, teloneados pela banda asturiana Aftermaths.

The Soulbreaker Company faen parada n’Avilés dientro de la so yá llarga xira de presentación de La llucha (2016, Alone Records), el so quintu álbum, una grabación perbién acoyida tantu pola crítica como pola so cada vez mayor lexón de siguidores. La banda gazteitzarra fai gala dende los sos entamos d’un rock reposáu con tintes escuros que bebe de la sicodelia, el folk ya inclusive el pop.

De la reconocencia alcanzada na escena ‘underground’ por The Soulbreaker Company falen les collaboraciones que contribuyeron al ésitu d’álbumes como Hot Smoke & Heavy Blues, The Pink Alchemist, Itaca, Graceless. Ente eses aportaciones destaquen les de Dave Anderson (Groundhogs, Van Der Graaf Generator), Liam Watson (Electric Wizard, White Stripes), Stef Hambrook (PJ Harvey, Paul Butler) o Tom Green (Melvins, Comets On Fire).

La banda formada por Jony Moreno (voz), Ortiz Domingo (batería), Daniel Triñanes (guitarres), Asier Fernández (guitarres), Illán Apuertes (baxu) y Javi Free (órganu, pianu y sintetizadores) consolidó mientres los últimos años la so sonadía a nivel nacional ya internacional, lo que los llevó a actuar en festivales como’l Azkena Rock Festival, la Serie Z, o’l Yellowstock Festival (Bélxica), tocando al pie de bandes como Howling Rain, Wilco, Radio Moscow o Moon Duo.

  Categories: