‘The Nile Hilton Incident’ llogra la Espiga d’Oru del festival de Valladolid

by redacción asturnews | octubre 30, 2017 10:31 am

La película The Nile Hilton Incident, roblada por Tarik Saleh, foi galardonada esti sábadu paásu cola Espiga d’Oru al Meyor Llargumetraxe de la 62 edición de la Selmana Internacional de Cine de Valladolid (Seminci).

La película de Saleh inspirase nel asesinatu real de la cantante llibanesa Suzanne Tamim. Pela so parte, la Espiga de Plata foi pala película The Rider, de la directora Chlóe Zhao.

El premiu pal meyor actor foi parar a Brady Jandreau pol so trabayu en “The Rider”; y el de la meyor actriz recayó ex aequo en Laetitia Dosch pol so papel en “Jeune femme”, de Léonor Serraille; y Agnieszka Mandat-Grabka, pol so trabayu en “Pokot”, de Agnieszka Holland, según decidió’l xuráu del festival esta mañana en Valladolid.

El de meyor director foi parar tamién a manos Tarik Saleh, pol so “thriller” policiacu qu’afonda nel sistema corruptu exipciu, enmarcáu dientro de la denominada Primavera Árabe. Tamién s’alzó esta producción sueca, alemana, danesa y marroquina col premiu Miguel Delibes al meyor guión, según dictaminó un xuráu internacional integráu por seis espertos cinematográficos y onde el novelista Ray Loriga encargóse de lleer el dictame, recibíu con delles ulles na sala.

Coles mesmes, el premiu al meyor nuevu director recayó tamién na directora Cholé Zhao, que econcursara cola película premiada cola Espiga de Plata, “The Rider”, una hestoria basada y protagonizada por non actores que narra la superación d’un nueva estrella del rodiu que ve atayada la so vida por cuenta de un fatal accidente asocedíu mientres montaba.

El xuráu tamién decidió condecorar con una mención especial el llargumetraxe “Human flow”, del activista políticu chinu Ai Weiwei, quien presentó nesti festival la cruda hestoria real qu’arrodia a la crisis mundial de los refuxaos. Per otru llau, los curtiumetraxes premiaos nesta 62 edición de la Seminci fueron “Negah” (La mirada), de Farnoosh Samadi, que s’alzó cola Espiga d’Oru nesti formatu,  ente que’l curtiu “A drowning man” (Un home afuégase), de Mahdi Fleifel, llogró la Espiga de Plata. Fora de la sección oficial, el documental “La llibertá del diañu”, del cineasta mexicanu Everardo González, llogró’l primer premiu na sección Tiempu d’Hestoria.

Source URL: http://asturnews.com/the-nile-hilton-incident-llogra-la-espiga-doru-del-festival-de-valladolid/