‘Tenet’, lo último de Christopher Nolan, aporta al cine en xunetu

‘Tenet’, lo último de Christopher Nolan, aporta al cine en xunetu
18 mayu 08:54 2020 Imprimir

La próxima película de Christopher Nolan yá tien fecha d’estrenu pal 17 de xunetu. Tratase de Tenet, una de les películes que pretende llegar al espectador pola gran pantalla magar l’actual pandemia de coronavirus.

Dende’l so saltu a EE.XX. con Memento, el cineasta nun dexó de sosprender a los y les spectadores y agora propúnxose volver faelo con esti filme, del que nun se tien más información qu’una llínea de sinopsis: “un thriller ambientáu nel mundu del espionaxe internacional”.

Una nebulosa de misteriu que fai si cabo más intrigante la espera. Lo que tamién se sabe ye que se publicó un llibru, del making of de la cinta que va esbillar tolos secretos y trucos de la producción, pensáu especialmente por que’l gran públicu entienda qué hai vistu en pantalla. El volume, The Secrets of Tenet: Inside Christopher Nolan’s Quantum Cold War, yá puede encargase per internet en plataformes como Amazon.

A too esto tien de añedise que dalgunos de los sos actores, como Michael Caine, reconocieron a la prensa que nin ellos mesmos saben de qué va. L’intérprete esplicó nuna entrevista que “tolo que tenía yera un día de trabayu y [Nolan] diome les páxines correspondientes. Fixi’l mio parte y filmé namá con John David Washington. Y dende entós nun supi namás”.

A Caine y Washington acompáñenlos un elencu de cinco estrelles, ente los que figuren Robert Pattinson, Elizabeth Debicki, Kenneth Branagh o Aaron Taylor-Johnson.

  Categories: