Tejedor “baxa’l telón” depués de 24 años

Tejedor “baxa’l telón” depués de 24 años
24 mayu 14:46 2019 Imprimir

Depués de bien d’años n’activo, munchos bonos momentos y grandes amigos atopaos pel camín, “Tejedor” facía anuncia esta selmana de que baxa’l telón. Comunicábalo nel so Facebook el miércoles pela tarde Javier tejedor, uno de los tres hermanos que llevaren la música folk asturiano per toa Europa.

Tejedor foi un grupu de música folk d’Avilés formáu durante cásique 24 años pelos tres hermanos (Jose, Javier ya Eva Tejedor). Los miembros de Tejedor tocaron tolos estilos de música tradicional asturiana emplegando al mesmu tiempu instrumentos tradicionales como gaites, flautes, curdiones y guitarres.

Tejedor ye conocío na escena musical celta internacional, ganando los dos hermanos del grupu delles vegaes los premios McCallan de gaita del Festival Intercélticu de Música de Lorient, Bretaña.

El so primer álbum, Texedores De Suaños, tuvo un pergrande éxitu y foi producío por Phil Cunningham.

La dispidida facíanla Javi Tejedor el miércoles nel so Facebook con esta carta:

Bonos díes, amigos.

Depués de bien d’años n’activo, munchos bonos momentos y grandes amigos atopaos pel camín, “Tejedor” baxa’l telón.

Agradecemos-yos munchísmo a caún de los que dalguna vez se molestaron en sentir la nuestra música, a toos esos organizadores que nos dieron la oportunidá de xubir al escenariu nesos más de 600 conciertos, a tolos músicos que nos fixeron medrar, lletristes, arreglistes, a toos esos técnicos que nos lo punxeron más fácil y n’especial a los más importantes, la nuestra xente más averao, grandes músicos y grandes amigos…. Ramón G. Morán, Horacio García, Chus Castro, Alberto Ablanedo, Rubén Álvarez y Silvia Quesada. Gracies por formar parte de “Tejedor”.

“Tejedor” nunca diba ser lo mesmo ensin Eva Tejedor, Ígor Medio, Carlos y Toño Barral, Phil Cunningham, Ediciones Resistencia y César Ibarretxe.

Gracies a esa primer banda: Israel Sánchez, Rubén Bada, Tana, Sergio Rodríguez y Roberto Jabonero.

Namás queremos recordar a toos que caún de nós va siguir teniendo nome y apellíos, y que “Tejedor” yera un grupu, un sellu, una identidá que dexa de funcionar. Por favor, por respetu a esto, nunca faléis o vos aprovechéis d’esta marca p’anunciar daqué que’l públicu nun va presenciar.

¡Salú!

  Categories:
Loading Facebook Comments ...