Portada Lorient 2007 Tejedor triunfa en Lorient con un espectáculu sinceru y efectivu

Tejedor triunfa en Lorient con un espectáculu sinceru y efectivu

by asturnet

El Palacio de Congresos de Lorient enllenose a reventar pa aplaudir a Tejedor na que yera la so segunda actuación en Lorient 2007 depués de sorprender al públicu qu’acudió al conciertu de Sinead O’Connor el vienres, onde actuaron de teloneros. Tejedor algamó un espectáculu cenciellu pero efectivu que cuntó cola collaboración del grupu de pandereteres Dulcamara. Eva, Javi y Jose Manuel tienen d’ufrir nesta nueche del martes el so caberu conciertu nel Festival de Lorient.

El dominugu, xunta Sinead O’Connor, Tejedor ya amuesó’l bon momentu creativu ya interpretativu que viven los tres hermanos d’Avilés y dexó bien nidio que s’alcuentra afayáu tanto con públicos modernos como más tradicionales. Pero esta nueche del llunes afitó’l por qué les coses-y van tan bien al grupu: execuciones escelentes, un repertoriu tan equilibráu como afayadizu, una bona puesta na escena y amás una interpretación honrada y modesta. Con Eva marcando la llínia de la perfeición cola so voz y l’aliendu más simpáticu, Javi y tejedor amuesaron un virtuosismu propiu del maxisteriu qu’a la gaita tien el mayor de los hermanos y que en Lorient rubricó con un floreáu que llevantó al públicu de los asientos.

El espectáuculu tuvo un añadíu qu’ameyoró abondo la interpretación de dellos temes col grupu de pandereteres Dulcamara, que-y fizo los coros a Eva Tejedor en dellos cancios.

Tamién te podria gustar