Tejedor coronó Tormaleo nel Festival de Lorient 2012 col sofitu de la Banda La Villa ya invitaos mui especiales

08 agostu 23:02 2012 Imprimir

El momentu en que Tejedor invitó al escenariu del Grande Theatre de Lorient a la Banda de Gaites La Villa foi el momentu cimeru del conciertu midíu y acompasáu qu’ufrió nel Festival de Lorient d’esti 2012, amosando la profesionalidá del grupu y la so capacidá pa dexar ver nel escenariu lo que tien tres de sí munches hores de llabor y ensayu. Nun foi esi’l momentu postreru, sinon l’entamar d’una segunda parte del conciertu que llogró entá superar la primer aplaudida hora de música sincera y sentida.

El conciertu de Tejedor na nueche del martes nel Grande Thjeatre de Lorient tenía ya’l preámbulu de la so presencia nel Espace Marine na nueche del Domingu pa dir abriendo boca al públicu bretón qu’esperaba pol Buena Vista Club Social y el so danzón cubanu. Ya nesa apaición colmara les espectatives del públicu, pero la so apaición n’escena nun yera sinon un aperitivu, como amosó nidiamente esti martes.

Ensin la presencia de la so hermana nes voces, perbien sostituida por Silvia Quesada, los hermanos Tejedor dexaron como siempre’l pabellón onde s’espera. Acompasaron un conciertu afayadizu pal so interés, más musical qu’espectácular, aunque meyorando añu tres d’añu no escénico.

Jose Manuel y Javier persupieron saca-y partíu a la presencia nel escenariu a ratos de los sos invitaos, lo mesmo nel casu del solu de txalaparta de los collacios vascos Iñaki Plaza y Jon Garmendia como la interpretación, ora acompangada por Silvia Quesada ora a Capella, de la irlandesa Karan Casey, siempre tan averada al públicu y fresca como allugada onde-y correspuende.

Y sobremanera de l’apaición de la Banda de Gaites de la Villa, tan destacada como siempre, tan entregada como nunca. Nesi momentu entamó otru conciertu, el más averáu el públicu, el que forzaba un bis col floreao de Remís, tan excepcional como davezu nos deos de Jose Manuel Tejedor. esi otru conciertu, otra vuelta colos invitaos, toos los tres, xuntos y en solitariu. Una segunda parte tan perfecha como la primera. Y un exemplu del nivel al que tan aportando les bandes asturianes nes que la maurez entama a dar pasu a la mocedá en toles estayes.

  Categories:
Loading Facebook Comments ...