Teatru La Cascaya trai “Lokus” a Xixón

25 marzu 11:25 2019 Imprimir

El Centru Municipal Integráu (CMI) Pumarín Xixón-Sur acueye nel so salón d’actos, esti llunes 25 de marzu a les 19.30 hores, la representación de “Lokus” montaxe n’homenaxe a Shakespeare, Chejov, Beckett y Brel del grupu Teatru La Cascaya.

Lokus ye una comedia qu’esquiza los sentimientos de la soledá, l’amor, la depresión, l’amistá, el sexu, el pasu del tiempu…y que coles mesmes, escenifica les peripecies vitales d’una serie de personaxes con una entrañable tenrura y una ferida, fonda y doliosa humanidá.

Teatru dientro del teatru, vida fecha lliteratura. Lokus ye una obra escrita con un llinguaxe vivu que disecciona la parte más íntima, fonda, secreta y vulnerable de l’alma humana.

Homenaxe a Shakespeare, Chejov, Beckett, Brel…Lokus plantega una serie de risonderes vivencies que conxuguen l’humor y el drama con una sutil ironía y una punchante emotividá col fin de consiguir, como dicía’l maestru Adamov, que l’espectador sonría ensin perder la seriedá.

CMI Pumarín Xixón-Sur. Salón d’actos. Llunes 25 de marzu a les 19.30 hores

  Categories: