Teatru del Norte estrena “La Gavilueta” na Selmana de Teatru de La Pola Siero

by redacción asturnews | julio 12, 2018 8:47 am

Col estrenu de “La Gavilueta” esti xueves 12 de xunetu, a les 21 hores, nel Teatru-Auditoriu de La Pola Siero, Teatru del Norte torna a los escenarios sierenses.

La Gavilueta orixinal estrenose  en 1896  y foi un fracasu total. En 1898 vuelve estrenase nel Teatru d’Arte de Moscú so la dirección de Stanislavski y foi un ésitu atayante. Esta obra ye una reflexón sobro l’arte polo xeneral y l’escénicu en particular: Arkadina y Nina son actrices:   Trigorin y Treplyov son escritores, en distintos graos d’ésitu o fracasu profesionales.  La hestoria de trunfadores, persones con talentu (Arkadina y Trigórin), detrás  de los que cuerren  los personaxes ensin talentu (Nina y Konstantin). Pero, sobremanera, La Gavilueta ye una reflexón  sobro la relación ente padres  y fíos. Malos padres y malos fíos. Unos padres que nun dexen crecer a los sos fíos, que nun dexen qu’estos creen y desenvuélvanse artísticamente. ¿Solo por mieu a que-yos quiten el puestu? Nina y Konstantin tienen que pagar un altu preciu por si idealismu metanes un mundu fondamente materialista.

La Gavilueta, xuntu con Hamlet, son les dos obres que meyor nos falen de la mocedá. Una mocedá que, tamién como la d’agora, nun tien futuru; xuna mocedá a la que los mayores nun quieren dexar sitiu; xuna mocedá ensin pasáu nin  horizonte profesional.

Esti xueves 12 de xunetu a les 21 hores, nel Teatru-Auditoriu de La Pola Siero. Entraes: 7 euros. A la vienta en taquilla, Casa de Cultura de La Pola Siero y na web www.sieroentradas.es

Source URL: http://asturnews.com/teatru-del-norte-estrena-la-gavilueta-na-selmana-de-teatru-de-la-pola-siero/