Tarantino va publicar en 2021 una novela del so film ‘Érase una vegada en…Hollywood’

El cineasta Quentin Tarantino robló un alcuerdu pa publicar dos llibros cola editorial HarperCollins, unu d’ellos una adaptación de la so película Érase una vegada en…Hollywood, que va salir a la vienta pel branu de 2021 y qu’afonda más nos personaxes y l’argumentu de la película.

Esta novela de Tarantino, que rinde tributu a los llibros de bolsiellu que d’antiguo se publicaren d’acordies coles películes que s’estrenaben nos cines y que él taramiaba siendo neñu, va llegar primero al mercáu en formatu de tapa blanda, xuntu con una versión de llibru electrónicu y otra d’audiu,  ente qu’otra más luxosa, de tapa dura, va salir a la vienta na seronda.

El segundu llibru de Tarantino con HarperCollins va ser un exemplar de lliteratura de non-ficción tituláu “Cinema Speculation”, una “fonda inmersión nes películes de los años 70, un ricu amiestu d’ensayos, reseñes y escritos personales (…) d’unu de los directores más celebraos del cine y el so fan más devotu”, apunta la editorial nun comunicáu.

En concretu, la novela Érase una vegada en…Hollywood va trazar la vida de los dos personaxes protagonistes de la cinta, l’actor de televisión Rick Dalton y el doble qu’usa nes sos escenes de riesgu, Cliff Booth, tantu antes del entamu de la trama que cunta la película como dempués. Va Incluyir, amás, dalgunes de les escenes más célebres de la película, lo mesmo que de personaxes como’l de Burt Reynolds, que nun se vio na versión editada del llargumetraxe.

“Los talentos lliterarios de Quentin Tarantino tuvieron a la vista de toos dende los sos primeros guiones, pero la maña cola que da vida a los sos personaxes sobro papel y cómo costantemente sospriende al llector, inclusive a aquellos que se saben la película de memoria, ye ver a un maestru narrador probando un nuevu formatu y faelo únicu”, dixo nun comunicáu’l vicepresidente de HarperCollins, Noah Eaker.

La noticia d’un cambéu d’aldu na carrera de Tarantino nun sosprendió a los sos siguidores, yá que en más d’una ocasión mentó los sos planes d’aparcar la so faceta de director de cine dempués de dirixir la so décima película pa convertise n’escritor. Nuna conversación col críticu de cine Peter Travers a primeros d’añu, confesó que yá se siente mayor pal frenético ritmu que rique dirixir una película, qu’afecta amás a la so intención de pasar más tiempu cola so familia.

Érase una vegada en…Hollywood, un tributu a los años doraos de Hollywood, foi una de les películes más celebraes de Tarantino, que se llevó 10 nominaciones a los Oscar y que fixo posible que Brad Pitt facer cola so primer estatuína de l’Academia.